دووبارە ھاتنا داعش ١٨ ھزار خێزانێن دی ئاوارەی ھەرێمێ کرن
ئەڤرۆ نیوز، ئەمیر ئەترووشی:
ژ ئەگەرێ دوووبارە لڤینا دا ل دەوروبەری پارێزگەھێن نەینەوا و کەرکووکێ و دەڤەرێن دی، دووبارە ١٨ ھزار خێزان ئاوارەی ھەرێما کوردستانێ بوون.
ھوشەنگ محەمەد، رێڤەبەرێ ناڤەندا ھەماھەنگیا قەیرانان ل ھەرێما کوردستانێ بۆ ئەڤرۆ نیوز دیار کر کو ژ ئەگەرێ تێکچوونا بوارێ ئێمناھیێ و دووبارە سەرھلدانا داعش ل دەڤەرێن کوردستانی یێن ژ دەرڤەی ئیدارا ھەرێما کوردستانێ، ژ بەر مەترسیا رێکخراوا تیرۆری یا داعش، دووبارە دەست ب ئاوارەبوونێ ھاتیە کرن و ھەتا نھا ١٨ ھزار خێزانێن دی ئاوارەی ھەرێما کوردستانێ بووینە و گۆت: “نھا ملیۆنەک و ١٧٩ ھزار ئاوارە ل ھەرێما کوردستانێ دژین و ھێشتا نەڤەگەریاینە سەر مال و مۆلکێن خوە”.
ئەو یەک ژی نەڤەشارت کو ئەو خێزانێن دووبارە ئاوارە بووین ژ بەر ھاتنا داعش و مەترسیا کریارێن وێ، جارەکا دی ل کەمپێن ئاواران یێن ب سەر پارێزگەھا دھۆکێ و ھەولێرێ ڤە دھێنە دانان و ب تنێ د ئەڤ سالە دا ١٨ ھزار خێزان دووبارە ئاوارە بووینە کو پتریا وان ژ پارێزگەھا نەینەوا و سەلاحەدین و کەرکووکێ بووینە.
