دوور ژ تە
حەسەن ئیبراهیم
چیایێ گارە دو پێ بۆ خوە پەیداکرن، دانە بن خوە ورابووڤە. دڤیا ژ جهێ خوە برەڤت پشتی ژ ئاخێ خلۆلە بووی، هەژیا… خوار بوو، زانی هەکەر ژئاخێ ڤەبوو دێ گرێل بتە د وێ نهالا تاری دا. هەردو پێ ژ بن خوە هاڤێتنەدەر، ل جهێ خوە ما و سەرێ خوە بلندکر.
* * *
ڕوبارێ خابوور، ڤیا کوریا خوە ژ سەروکانیێ قوت بكەت، پشتی کوریا وی ژ بنێ چیای ڤەبووی و ژووردا دگەل پێلێن هار چوویە خوار نهالێن هشک لدویڤ دا ماین، ماسی و چووچک ئێدی نەزاین. باخ و بیستان هشک هێلاین، تژی دێمێ وی سەرکەتن بوو. چەند پێلێن دژوار، کوریا وی دگەل خوە دبرە خوار، پتر هار دبوو، سەرگەرم دبوو، دگۆت: ئەز نەبم، هوون ژی نینن – داویا سەرگەرمی وفێستیڤالێن سەرکەتنێن وی دا، کەلەخێ وی بکوریا وی ڤە، رادانە دەریایەکا کوور، هەموو هەولێن وی، هەموو بزاڤێن وی نەبوونە پێلەک ونەبوونە چپکەک ژئاڤا زەلالا خابووری، پەشێمانی نەبوو دەرمان.
* * *
دەشتا دوبانێ، ڤیا بەژنا خوە بپێچت… ڤیا ژبن پێ یێن جۆتیار و کۆچەرێن پەزچەرین بێتە دەر ژ خوەپێجانا وێ یا بلەز، ژدفن بلندیا وێ یازێدە گرێل بوو، بەرەف خوارێ چوو ژ سەرگەرمیا وێ یا هار، ل بنێ بیابانەکا هشک ئاسێ بوو… ل وێ بیابانا بەرفرەهـ، پێچانا بەژنا خوە دا بای؛ بێهنا وێ فەرەهـ بوو، نە کۆچەرن پەزی لێ بچەرینن… نە جۆتیارن زەڤیێن وێ بچینن… پشتی چەند رۆژەکان، تژی سەر پیستێ وێ یێ نەرم و نازک خیزێ شاریای بوو نەشیا بزڤڕت… نەشیا بمینت.
