دووماهی وەریان
ڕۆژا مزووری
پاییزە،
دێمێ ژیانێ یێ وەك میمۆكێ
ب ناڤچاڤێن رێكا منڤە خۆ دبرسقینیت
هەست و حەز دبن تابلۆ
حەوانا خەوا من ناهێت،
دلێ من ژ دەمی تێر بوو…
سەرێ من ژ هەمیێ فێر بوو…
كا ئەو شاعێرێ من ل سەر
زەندێ عەورێ وەك پەمبیێ بنڤینیت؟
كا ئەو ساحرێ ژ روحا خۆ لاندكەكێ
بۆ روحا من یا ماندی چێكەت و ب
دلۆڤانییا خۆ بكەت دەست و من تێدا ب هەژینیت؟
***
پاییزە
و ئەز دلبهاریمە،
پاییزە
و كەربێن من ژ وەرزا ڤەدبن
دەمێ كەڤلێ خۆ دگوهۆڕن..
ئەرێ پاییزێ،
زەربوونا تە نە مرنە، نە نەساخی؛
نووكرنا كراسێ خوداوەندا وەرزایە
کو د پەنجەرەیەكا ژۆرا گەردوونی دا
تبلا خۆ یا قلیجێ ئینایە دەر
و نازییا ب بایی دكەت..
زەربوونا هەتاڤێ ژی؛
نە ڕۆژئاڤابوونەکا سادەیە
بریندارکرنا تیشکانە
ب خەنجەرا ڕۆناهییەكا بێ نێڕینگەهـ؛
دبن عەوراندا نابینیت كو؛
كژلۆكێ ل سەر لێڤێن ناڤەڕاست خۆ ل بەر ئاخێ ڤەدایی،
و تەمبەلیا دەریایێ،
پاییزێ ژ بستۆكێ دگریت و ل ئاسۆیان
د خشینینت!
ئەڤ زستان هات دفلندییا تە بشكێنیت..
ئەو پاییزا
ب دەستێ شەڤێن بەر ب درێژبوونێ ڤە دچن
دهێتە خوارن…
تو د ناڤبەرا زەربوونان دا،
گورزەكێ ئاگری و خەنجەرەكا گۆتنێ هەلدگری؛
ڕتم د گۆرپانێ دا توندتر دبیت،
پەیڤ وەکی تڤەنگێن كویڤی دتەقن،
ئەڤجا ژیانا ته،
د ناڤ زەربوونا سییێ دا
ل گەل ڕەنگێن ژەنگگرتی یێن پاییزی
دبیتە دەنگڤەدانەكا مینكری، ڕەنگین،
نە ژكار دكەڤیت و نە دهێت ژبیرکرن!
