دو سەردەم
مەتین سەباح جمعە
ل سەرێ چیای، ل نێزیک کانیەکا پاقژ، ل سەر كەڤرەكی ڕوینشتی بوو، پێنوسەک و دەفتەرەک د دەستی دا بوون و تێبینیێن خۆ تێدا دنڤیسین، د وێ چرکێ دا، گەنجەک ب بازدان و ب لەز گەهشتە سەرێ چیای، تەلەفۆنەکا پێشکەفتی د دەستی دا بوو و یێ مژۆلی وێنەگرتنێ بوو… چاڤێ وی ب پیرەمێری کەت، هاتە پێش و ب پێکەنین ڤە گۆتێ: مامۆستا، تو هێشتا ل ڤێرە یێ مژۆلی کاغەز و پێنوسیی؟ نوکە جیهان یا بلەز بووی! ئەز ب ڤێ تەلەفۆنێ ب چەند چرکەکان دشێم نامەیەکێ بگەهینمە هەمی جیهانێ. د ڤی سەردەمی دا، لەزاتیا مە گەنجان یا سەرکەفتی یە!
پیرەمێری ب هێمنی سەحکرێ، زەردەخەنەک کر و گۆتێ: کوڕێ من، گەنجاتی هێزەکا جوانە، بەلێ پێدڤی ب ئەزموونێ هەیە. وەرە دا ئەز و تو ڕکابەریەکێ بکەین؛ تو ب تەلەفۆنا خۆ و ئەز ب پێنوسێ خۆ، دا ئەم هەردو کورتەبابەتەکێ ل سەر ڤێ کانیا ئاڤێ بنڤیسین، کا یێ کێ دێ جوانتر بیت. گەنجی ب دلخۆشی ڤە مەرج قەبوول کر، ب لەز ل سەر شاشەیا خۆ چەند دێرەک ل سەر جوانی و بلقاندنا ئاڤێ نڤیسین و گۆت: من تەمام کری!
پیرەمێری ژی هێدی هێدی ل سەر کاغەزا خۆ دنڤیسی، دەما تەمام كری؛ دەقێن ئێکودو خواندن، گەنج زۆر سەرسوڕمان بوو. پیرەمێری نڤیسی بوو: «کا چەوان ئەڤ کانیە بۆ چەندین سالانە ل ڤێرەیە، چەوان د زستانێن سەخت دا یا خۆڕاگر بوو، و چەوا ب بێدەنگی تێهناتییا خەلکی دشکێنیت…». پەیڤێن پیرەمێری گەلەک د ڕاستگۆ و کویر بوون. گەنجی سەحکرە دەستێن خۆ و گۆت: مامۆستا، پەیڤێن تە هزرێن مرۆڤی دهەژینین، ئەز نوکە تێگەهشتم کو لەزاتیا من تەنێ تشتەکێ دەمەكی یە، بەلێ ئەزموونا تە یا بهادارە.
پیرەمێری دەستێ خۆ دانا سەر ملێ گەنجی و گۆتێ: ئەڤە نە دۆڕاندنە، ئەڤە تەمامکرنا ئێکودو یە. گەنجاتی پێدڤی ب ئەزموونا پیراتیێ هەیە دا کو ڕێیا ڕاست بەرزە نەکەت، و پیراتی ژی پێدڤی ب وزەیا گەنجاتیێ هەیە، ئەڤە یاسایا ژیانێ یە. د وێ چرکێ دا، باهۆزەکا سار دەستپێكر، شەحنا تەلەفۆنا گەنجی ژی کێم بوو و پاشی ڤەمری، بەلێ کاغەزێن پیرەمێری هێشتا د دەستان دا بەردەست بوون.
گەنج تێگەهەشت کو تشتێن بلەز زوی دچن، بەلێ ئەزموونا ڕاستەقینە دمینیت. وی گەنجی داخوازا پێنوسەکێ کر و پیرەمیرێ نڤیسەر پێنوسەکێ کەڤن پێشکێشی كر، گەنج ل تەنشت پیرەمێری ڕوینشت و پێکڤە دەست ب نڤیسینێ کرن.
