دھۆکیەک بۆ یێ ئێکێ ل سەر ئاستێ ئەلمانیا
ئەڤرۆ، زنار زوبێر:
یاریکەرێ بنیات کورد و کورێ پارێزگەھا دھۆکێ ئاری حەمید شیا رێزا ئێکێ د قارەمانیا ئەلمانیا یا کینگ بوکسێ دا ب دەستخوە ڤە بینت د کێشەیا ٣٢ کگم پشتی پێنج سەرکەفتن تومارکرین د قارەمانیا ئەلمانیا دا ئەوا ھەڤرکیێن وێ بەری دو رۆژان ل باژێرێ لایبزێک ب دووماھی ھاتین.
ل دۆر ڤی ناسناڤی حەمید ئێمینکی بابێ یاریکەرێ ناڤبری د داخویانیەکا تایبەت دا بۆ رۆژناما ئەڤرۆ گۆت: یاریکەر کینک بۆکسینگێ ئاری حەمید ل گەل یانا خوە یا باژێرێ دسلدورف یا ئەلمانیا پشکداری د ھەڤرکیێن قارەمانیا ئەلمانیا یا کینک بۆکسینگێ دا کر ل باژێرێ لایبزێک یێ وی وەلاتی د کێشا ٣٢ کگم و شیا د پێنج یاریان دا ل دووڤ ئێک سەرکەفتنێ ب دەستخوە بینیت و ل رێزا ئێکێ بھێت کو بۆ ماوێ دو رۆژان ھەڤرکیێن ڤێ قارەمانیێ د بەردەوام بون.
ناڤبری ئەو چەندە ژی دیارکر کو ب ڤان ئەنجامان یاریکەری ئاری حەمید دێ پشکداری قارەمانیەکا دی ژی ل ڤان نێزیکان بیت و ھەر دەمێ ئەنجام باش د ڤێ قارەمانیی دا ب دەستڤە ئینان دێ ھێتە داخوازکرن بۆ ناڤ پێکھاتیێ سەرەکی یێ ھەلبژارتیێ ئەلمانیا بۆ قارەمانیێن نێڤدەولەتی.
دھێتە زانین ئاری حەمید برایێ یاریکەر سوزان حەمید ئەوا بەری ماوەکی رێزا دویێ د قارەمانیا جیھانێ یا کینک بۆکسینگێ دا ب دەستخوە ڤە ئینای کو ھەردو یاریکەر خەلکێ پارێزگەھا دھۆکێ نە و نوکە ل وەلاتێ ئەلمانیا د ئاکنجی نە.
