دھۆک ئەڤرۆ چاڤ ل ھێزا جەماوەری یە
ئەڤرۆ:
تیما تەپا پێی یا یانا زاخۆ شیا سەرکەفتنا خوە یا دویێ د خولێ تومار بکەت پشتی دوھی ل یاریگەھا خوە ب سەرکەفتی لسەر مێڤانا خوە یانا مەسافی ب گولەکێ بێ بەرامبەر و گۆلا یانا زاخۆ د نیڤا دویێ دا ژلایێ یاریکەرێ وێ یێ لاو عومەر عومەر ھاتە تومارکرن و بریارە ئەڤرۆ تیما دھوک ب کەڤیتە د تاقیکرنەکا ب زەحمەت دا.
د نیڤا ئێکێ یا یاریا زاخۆ و مەسافی دا ھەر دو تیم ھەتا رادەکی ل ئێک ئاست بوون و چەندین ھێرش لسەر گۆلێن ئێک دو لێک گوھارتن لێ نەشیان ئەنجامێ ڤێ نیڤێ بگوھورن.
دنیڤا دویێ دا یانا زاخۆ بھێز ھاتە دیاریێ دا و شیان چەندین ھێرشان بو سەرگولا یانا مێڤان ببەت ئەوبوو ھەتا دەقیقا ٨٣ ژ یاریێ یاریکەرێ لاوێ زاخۆ عومەر عومەر گولا ئێکێ و سەرکەفتنێ بو تیما خوە زاخۆ توماربکەت و سێ خالێن گرنگ ل گەنجینا تیما خوە زێدەبکەت.
لدور ڤێ سەرکەفتنێ یاریکەرێ یانا زاخۆ سەھەل نعێم گوت: یاریا مە نە یا بساناھی بوو چونکو بەرھەڤیێن مە د باش نەبوون لێ بێ پیشەکار و ب یاریکەرێن لاو جارەکادی ھاتینە سەر رێکا سەرکەفتنا.
ژلایەکێ دووڤە بریارە ئەڤرۆ تیما تەپا پێی یا یانا دھۆک بکەڤیتە د تاقیکرنەکا ب زەحمەت دا پشتی بجە ھێلانا راھێنەرێ تیمێ و چەند یاریکەران دەمێ مێڤانداریا تیما تەپا پێی یا یانا نەجەف دکەت، ئەوا ژلایێ خو ژی ڤە د قەیرانا ئەنجامێن خراب و نەبوونا یاریکەران دا دبوریت.
یاریا ئەڤرۆ تاقیکرنەکا مەزنە بو راھێنەرێ تیمێ یێ نوو حازم سالح ئەوێ بەری چەند سالان وەکو ھاریکارێ باسم قاسمی کار ل گەل کری و ئەڤ سالە راھێنەرێ تیما تەپا پێی یا خۆلا کوردستانێ دێ کەڤیتە بەرامبەر ئێکەم ئەزموون د خولا عیراقێ دا، ژلایەکێ دووڤە ھەڤرکیەکا مەزنە ژلایێ یاریکەرێن کورد ڤە بو وێ چەندێ بو ھەمی پشتەڤانان دیارکەن کو چو ژ یاریکەرێن ژ دەرڤەی باژێری کێمتر نینن و شیانێن پشکداریکرنەکا ل ئاستێ پێدڤی ھەنە و دێ ھەمی ھەولا مەزێخن ژ سەر رێکا سەرکەفتنا دوورنەکەڤن و سەرکەفتنا شەشێ توماربکەن د کاروانێ خوە یێ ئەڤ سالە دا.
ل دور ڤێ یاریێ راھێنەرێ یانا دھۆک حازم سالح بۆ رۆژناما ئەڤرۆ گوت: یاریەکا ب زەحمەتە بەرامبەر نەجەف چونکو تیما مە پشتی چەندین یاریکەر لێ ھاتینە زێدەکرن لێکتێگەھشتن دێ یا کێم بیت، لێ مە باوەریەکا مەزن ب شیانێت یاریکەرێن خوە ھەیە کو بشێن بەردەوامیێ بدەنە سەرکەفتنێت بەری نوکە.
زێدەتر حازمی ھیڤی خواستن ژ جەماوەرێ تیمێ د ڤێ یاریێ دا ئاما دەبیت و گوت: تیما مە بو یاریا ئەڤرۆ ژ ھەر یاریەکا دی زێدەتر پێدڤی ب جەماوەری و پشتەڤانا ھەیە و ئەڤ یاریە دێ پتر دلسوزی و زاخا یاریکەان بو یانێ رولێ خوە گێریت.
