دھۆک و زاخۆ پێشکەڤتن و زێرەڤانی پاشڤە زفری
ئەڤرۆ نیوز،ھەژار مەعروف:
ب ئەنجامدانا چار یاریان ئەڤرۆ یاریێن گەرا ١٨ ژ خۆلا پلا نایاب یا تەپا پێ یا کوردستانێ ب دووماھیی ھاتین دو نوونەرێن دھۆکێ ب سەرکەفتن و دو ژی وەکھەڤبوون.
ل یاریێن ئەڤرۆ دا یانا دھۆک پشتی ل شەش یاریێن بوری ل دیڤ ئێک نەشیا سەرکەفتنێ توماربکەت ئەڤرۆ ژ دەرڤەی یاریگەھا خوە ل یاریا دێربیا کوردستانێ شیا سەرکەفتنەکا گرنگ ل سەر یانا ھەولێر توماربکەت ب دو گولان بێ بەرامبەر و جارەکا دی ھیڤێن خوە ڤەگەراندنە ڤە بوو ھەڤرکیێ ل سەر رێزێن پێشیی و ژ رێزا شەشێ ل ھەلویستا خولێ دا بەر ب رێزا چارێ چوو ب ٢٧ خالان.
زاخۆ پشتی ئەنجامێن لاواز ڤەگەریا و سەرکەفتنا دوێ ل دیڤ ئێک تومارکر
ژلایەکێ دیڤە ل یاریگەھا دەلال یانا زاخۆ سەرکەفتنا خوە یا دوێ ل دیڤ ئێک تومارکر پشتی شیای ب سەرکەفت ل سەر ئێک ژ ھەڤرکێن خولێ یانا نەوروز ب دو دولان بێ بەرامبەر و زاخۆ ژی دو رێزا پێشڤە چو کو ژ رێزا ١١ بەر ب رێزا ٩ ڤە چو ب ٢٢ خالان و خوە ژ مەترسیا پاشڤەزفرینا خولێ ھەتا رادەیەکی دورکر .
زێرەڤانی ب ھێز ھات و جارەکا دی ڤەگەریا ڤە
تیما تەپا پێ یا زێرەڤانی ل ھەرسێ حەفتیێن گەرا ١٣ ھەتا ١٦ ب ھێز ھاتە دناڤ ھەڤرکیێ دا و وەسا ھاتە پێشبینی کرن زێرەڤانیا جاران ڤەگەریا ڤە پشتی شیا سێ سەرکەفتنا ل دیڤ ئێک توماربکەت لێ ل ھەردو یاریێن خوە یێن دووماھیی نەشیا سەرکەفتنێ توماربکەت و ل حەفتیا بوری ل یاریگەھا خوە خوسارەت بوو ئەڤرۆ ژی ل گەل یانا پێشمەرگا سلێمانی یا بریندار وەکھەڤبوو ب گولەکێ و ب ڤی ئەنجامی زێرەڤانی ژ رێزا چارێ پاشڤە چو رێزا پێنچێ ب ٢٦ خالان.
ئاکرێ یا بەردەوامە ل سەر ئەنجامێن لاواز
نوونەرا چارێ یا پارێزگەھا دھۆکێ یانا ئاکرێ یا بەردەوامە ل سەر ئەنجامێن خوە یێن لاواز ل وەرزێ ئەڤ سالە پشتی دوھی ل ناڤ ئەرد و جەماوەرێ خوە دو خالێن گرنگ ژ دەستداین دەمێ وەکھەڤبووی ل گەل یانا گاز باکور بێ گول و ب ڤی ئەنجامی ب ١٢ خالان رێزا دووماھیێ دھێت
