دۆم
زوھێر کورەمارکی
ئەڤە ھاتم دەست رەنگین و کارسازم ئەزم دۆم
ل جھێن خۆش و جوان دگەڕم وارێ منە زۆزان و زۆم
لۆما ژمن نەکەن، دعەشقا وەلاتی دا شێت و شەیدا بووم
ھندی ھند حەژێ دکەم، دعەشقا وی دا بەرزەبووم
من گۆتن و ڤەوژاندن گەلەک ستران و داستان و چیڕۆک
کارسازم من چێکرین گەلەک لاندک و خانک و تیڕۆک
بۆچی ھوون تشتا دبێژنە مە، مە دکەنە چننە و لێبۆک
ماھوون نزانن، قەردارێن مەنە گەل و مللەت و دیڕۆک
کوردستان وارێ مەیە، حەژێ دکەین ژ جان و دل
خەباتێ بۆ دکەین مەھلداینە زەند و باسک و تل
وەلاتێ مە شۆخ و شەنگە دێ دگەل بین مل ب مل
بۆ تاڕی شەڤێن وی دێ بینە شەمالکێن گەش و ھل
ئەڤە چەند سال و دەمن چاڤێ وەلاتی یێ لکە دامە؟
وەرن چاڤێن وی کلبدەین ھێش د ڕۆنن چاڤێن مە
مەم و زین وسیابەند و دمدمی گۆتی دیڕۆکا ھەوەمە
ئەز بۆ خاکا خۆ تێکشەر و خەباتکەرم
بۆ دوژمنی ژی بڤەمە
ئەم دیرۆکین، نەڤییێن گۆتی و لۆلۆ و کاشی و میدینە
کارسازێن چاکین، خزمەتکارێن ڤی خاک و ڤی وارینە
ستوونا شارستانیەتێ، ئاڤاکەرێن کەلتۆر و کەلەپۆرێ گەلینە
نەبێژن ھوون کینە، ئەم قەڕەچ و ھۆستا دۆمێن کوردینە!
وەرن دەستێ ئێک بگرین ئاڤا بکەین وەلاتێ ڕەنگین
ھەر ئەمین ب زمان و کەلتۆر و کەلەپۆرێ خۆ زەنگین
دێ ھیڤییا چینین، ئارمانجا چنین، دێ ئاگری ب نەیارا ڤەنین
بۆ ئێکودو دێ بینە باڤ و برا، ئاوازێن ئێکبوونێ ژەنین
ئەرێ دێ ژەنین؟
