دیاردا نشته‌گه‌ریێن جوانكاریێ به‌ر ب زێده‌بوونێ یه
ئه‌ڤرو، مه‌نیجا ئه‌یوب:
ب شێوه‌كێ گشتی د ڤی سه‌رده‌می دا جڤاك گرنگیه‌كا زور ب جوانیێ دده‌ت، ئه‌ڤه حه‌زه‌كه و هه‌ر كه‌سه‌ك حه‌ز دكه‌ت ب شێوه‌كێ سه‌رنجراكێش ده‌ركه‌ڤیت له‌ورا خه‌لك په‌نایێ بو نشته‌گه‌ریێن جوانكاریێ دبه‌ن، نوشداره‌ك دبێژیت: 80% گه‌نج نیشته‌گه‌ریێ بو دفنا خوه دكه‌ن، هه‌روه‌سا 85% یا ژنان فیله‌ر و بوتوكس و ده‌رزیا ددانن و گه‌له‌ك ژی داخوازا نشته‌گه‌ریا دكه‌ن، لێ د پێدڤی نینن.
دلین ئه‌حمه‌د كچه‌كا 23 سالیه و قوتابیا زانكویێ یه بو ئه‌ڤرو دیار كر روژ بو روژێ د جڤاكی دا پتر گرنگی ب جوانیا روخساری دهێته دان، مخابن ل زوربه‌یا جهان ژی وه‌لێ هاتیه هه‌كه تو خودان سیمایه‌كێ جوان بی دێ ته شه‌نس پتر هه‌بیت ژ ئێكا سه‌رو سیمایه‌كێ نه جوان هه‌بیت و گۆت: گه‌له‌ك جاران هه‌تا د وه‌رگرتنا كاران دا ژی مه دیتیه كار بو كچێن جوان هه‌یه و هه‌تا ژ لایێ گه‌نجان ژی ڤه پتر گرنگی ب كچێن جوان دهێته دان، له‌ورا كچ په‌نایێ دبنه به‌ر نشته‌گه‌ریا داكو سیمایه‌كێ جوان هه‌بیت.
نازه‌نین مسته‌فا، ماموستایا زانكویا نه‌وروز ل دور هه‌مان بابه‌ت دیار كر كو جوانی ژی وه‌ك پێدڤیێن سه‌ره‌كی لێ هاتیه ل ده‌ڤ هنده‌ك كه‌سان و روژ بو روژێ گرنگیه‌كا زێده‌تر ب جوانیا روخساری دهێته دان ل سالێن به‌رێ، به‌س كچان نشته‌گه‌ریێن جوانكاریێ دكرن لێ د ڤان سالێن دووماهیێ دا هه‌كه ئه‌م ته‌ماشه بكه‌ین كور ژی ب رێژه‌كا باش ڤان نشته‌گه‌ریا دكه‌ن و گۆت: ئه‌ڤ چه‌نده ژی چه‌ندین نه‌رێنیا ل دووڤ خوه دئینیت گه‌له‌ك جاران نشته‌گه‌ری بویه ئه‌گه‌رێ هندێ كو روخسارێ وان نه‌شرینتر لێ بهێت و تووشی چه‌ندین نه‌خوشیێن دی ببن.
نازه‌نینێ زێده‌تر گۆت: هه‌روه‌سا گه‌له‌ك كه‌سان بارێ وان یێ ئابوری یێ باش نینه دێ په‌نایێ بو هنده‌ك كارێن دی به‌ن، ئه‌ڤ چه‌نده ژی دێ چه‌ندین ئاریشا ل دووڤ خوه ئینیت، هه‌تا گه‌له‌ك جاران هه‌ڤژین سه‌را ڤێ چه‌ندێ تووشی ئاریشێن خێزانی بووینه.
تایبه‌تمه‌ندێ نشته‌گه‌ریێن جوانكاریێ د. كاروان عزه‌دین به‌رواری ل دهوكێ دیاركر كو د ڤان سالێن دووماهیێ دا رێژا نشته‌گه‌ریێن جوانكاریێ به‌ر ب زیده‌بوونێ چوویه و ل ده‌ڤ هه‌ردو ره‌گه‌زان و 80% نشته‌گه‌ریێ بو دفنا خوه دكه‌ن و گوت: ڤان نشته‌گه‌ریان باشی و خرابیێن خوه هه‌نه ژ باشیێت وان گه‌له‌ك جاران شكه‌ستن یان خواربوون یا تێدا هه‌ی یان ژی هه‌ناسا وی ب دروستی ناهێت و بچیت، یان ژی هه‌ستیه‌كێ بلند تێدایه ئه‌ڤه ژی دبیته ئه‌گه‌رێ نه‌شرینیا سه‌رو سیمایێ مروڤی و تێكچوونا بارێ ده‌روونی یێ مروڤی، ئه‌ڤجا ئه‌نجامدانا نشته‌گه‌ریێ دێ ده‌روونێ وان ئارام كه‌ت و ژیانا وان خوشتر لێ كه‌ت، چونكی سه‌رو سیمایێ مروڤی كارتێكرنێ ل هه‌موو ژیانا مروڤی دكه‌ت.
دكتوری گۆتژی: ژلایه‌كێ دیڤه خرابیێن خوه ژی هه‌نه ب تایبه‌ت بو وان كه‌سێن ل دووڤ مودێلا دچن و دگوهۆرن ئه‌ڤه دێ بیته ئه‌گه‌ر كو كارتێكرن ل ساخله‌میا وان ببیت و گوت: ب رێژا 85% ژن دهێن فیله‌ر و بوتوكس و ده‌رزیا ددانن و گه‌له‌ك ژی دهێن داخوازا نشته‌گه‌ریا دكه‌ن، لێ د پێدڤی نینن.
تایبه‌تمه‌ندێ نیشته‌گه‌ریێن جوانكاریێ ئه‌و چه‌نده ژی دا زانین كو بهایێن نشته‌گه‌ریا ژ نوژداره‌كێ بو نوژداره‌كێ دی جیاوه‌زه، لێ بهایێن وان ل هه‌رێما كوردستانێ د گونجاینه.
