دیالۆگێن ل گەل ناخی
شەمال ئاکرەیی
١
تو: دەمەکێ پتر بدە من.
ناخ: دەم ناهێتە دان، بەلکو دهێتە بکارئینان.
تو: کەنگی دێ ب دووماهی هێت؟
ناخ: دەما ژ پرسیارکرنێ رادوەستی.
٢
تو: ئەز زیندانیێ عەقلێ خۆ مە.
ناخ: بزاڤێ بکە ژێ دەربکەڤە.
تو: ئانکو ژێ برەڤم؟
ناخ: هزرا دەرڤەی زیندانێ بکە، ژێ نەڕەڤە.
٣
تو: ئەو کییە د ناخی من دا دئاخڤیت؟
ناخ: ئەزم.
تو: تو کی؟
ناخ: هەر تو ب خۆیی… بەری دەرەوان بکەی!
٤
ناخ: چما دەرگەهی نا قوتی؟
تو: چونکی ئەز نزانم چ ل پشت هەیە.
ناخ: ئەگەر تە دەرگەهـ ب گرتی هێلا، دێ زانی؟
تو: نەخێر، بەلێ دێ یێ ب تەناهی بم.
ناخ: ئەرێ ما ڕاستی ژ تەناهیبوونێ گرنگتر نینە؟
٥
ناخ: تە سالێن درێژ یێن ژیێ خۆ ب هەروە بەرزەکرن.
تو: ما من بژاردە هەبوون؟
ناخ: ئەرێ، لێ تو د ترسێ دا بووی.
تو: ئەو سال بەرزەبوون؟
ناخ: نەخێر، تە یێن کرینە بەهایێ نەوێرەکییا خۆ!
٦
تو: من رێکا خۆ یا بەرزەکری!
ناخ: نەخێر، ب تنێ تو یێ ل جهەکی، تە پلان بۆ نەدانایە.
تو: ئێدی چ بکەم؟
ناخ: رێکەکێ بۆ خۆ دانە، یان ژی ژ بەرزەبوونا خۆ فێر ببە!
٧
تو: هەر دەم من گوهـ ل دەنگەکی دبیت.
ناخ: چ دبێژیت؟
تو: دبێژیتە من، تو نە توی!
ناخ: رەنگە دەم یێ هاتی، داکو بزانی کا تو کی؟
٨
تو: ئەرێ ئەڤە دووماهییە؟
ناخ: نەخێر، ئەڤە دەستپێکا تێگەهشتنا تەیە.
تو: پشتی هنگی؟
ناخ:کەس نزانیت، ئەڤە ژی ڤێ چەندێ پتر دئارینیت.
٩
تو: رێکێ نیشا من بدە؟
ناخ: رێکا چ؟
تو: رێکا تە.
ناخ:باشە، بەرۆڤاژی وێ رێکێ بگرە یا تە هزر دکر یا راستە!
١٠
ناخ: تو نە یێ ب تنێی.
تو: ئەو کی یە دئاخڤیت؟
ناخ: ئەز ناخێ تە مە، ئەوێ تە پشتگوهـ کری.
١١
تو: ئەرێ من مافێ گۆمانکرنێ هەیە؟
ناخ: ئەرێ، پێدڤییە ل سەر تە گۆمانێ بکەی.
تو: ل دۆر هەر تشتی؟
ناخ: ئەرێ.. ژ بلی گۆمانێ ل گۆمانکرنێ نەکە، چونکی ئەو دەستپێکە و نە دووماهییە!
١٢
تو: ئەرێ من هەبوونا خۆ داخوازکرییە؟
ناخ: نەخێر.
تو: باشە، بۆچی دێ هێمە سزادان ل سەر تشتەکی من داخواز نەکرییە؟
ناخ: چونکی ژیان نە گرێبەستە.. بەلکو بژاردەیەکا بێ داخوازییە!
١٣
تو: تو ژ کووڤە هاتی؟
ناخ: ژ پرسیارا تە یا ئێکێ.
تو: ئەرێ تو دی بارکەی؟
ناخ: ئەرێ، ئەگەر تە ئەز پشتگوهـ کرم.
١٤
تو: چما نا پەییڤی؟
ناخ: چونکی ئەز تێدگەهم.
تو : ما ئەڤە تێگەهشتنە؟
ناخ: تێگەهشتنا دروست پێدڤی ب پەییڤینێ نینە!
١٥
تو: ئەز یێ ململانێ ل گەل تە دکەم، چونکی ئەز یێ ل سەر ڕاستیێ.
ناخ: ئەز ژی هەروەسا.
تو: پا کی یێ شاشە؟
ناخ: ئەوێ ژ زانینا ڕاستیێ درەڤیت!
١٦
تو: چما دنڤیسی؟
ناخ: چونکی ئەز نەشێم بارێ بێدەنگییا تە هەلبگرم.
تو: تو چ دنڤیسی؟
ناخ: ئەز نەشێم ب دەنگ ببێژم!
١٧
ناخ: نها، تو یێ ژ دەرڤەی زیندانێ، چما یێ دامایی؟
تو: چونکی ئەز زیندانیێ تە مە!
١٨
ناخ: چما راوەستییای؟
تو: چونکی ئەز ژ بلنداهیێ دترسم.
ناخ: ما ل خوارێ چ هەبوو؟
تو: پەشیمانییا کو ئەز د دەمێ خۆ دا ژ پێسترکێ سەرنەکەفتم!
١٩
تو: رۆناهی من دئێشینیت!
ناخ: چونکی ئەو وی تشتێ تە ڤەشارتی، نیشا تە ددەت!
٢٠
تو: من د خەو دا ددیت، ئەز یێ هشیار بووم.
ناخ: نها، تو یێ نڤستی؟
تو: نزانم!
ناخ: پا هێشتا تو یێ د وێ خەونێ دا!
٢١
ناخ: تە ئەز سۆتم.
تو: ئەز نە گەهشتیمە تە.
ناخ: نێ، پەیڤێن تە پەنزین و ئاگر بوون.
٢٢
تو: ئەو چ پرسیارە ناهێتە کرن؟
ناخ: چما ئەم هەنە؟
تو: ئەرێ مە بەرسڤا وێ هەیە؟
ناخ: رەنگە بەرسڤ، نە پرسیارکرنا وێ ب خۆ بیت!
