دیدارێن دهۆك و نەورۆز ئاگرینن و زاخۆ و هەولێر چاڤ ل سەركەفتنێ نە
ڕاپۆرت: قەیس وەیس
جەماوەر و حەزژێكەرێن یارییا فوتبۆلێ ل ئیراقێ و كوردستانێ چاڤەڕێ نە ئەڤرۆ بۆ كۆمەكا دیدارێن نوو ژ هەڤڕكیێن گەڕا 12ێ یا خولا ستێرێن ئیراقێ یا فوتبۆلێ ب ئەنجامدانا سێ یارییان، سێ یانەیێن كوردستانی دێ سوبەهی یاریێن خوە ژ دەرڤەیێ یاریگەهێن خوە كەن و چاڤ ل سەركەفتنانە ژبۆ باشكرنا ڕێزبەندیێن خوە.
دهۆك ب مۆرالەكا بلند بەرانبەر ئاستەنگەكا بهێز
بڕیارە سوبەهی رۆژا ئەینی ل دەمژمێر پێنجێ ئێڤاری تیما یانەیا دهۆك دێ ل یاریگەها ئەلجولان ل باژێرێ فلۆجە بیتە مێڤانا یانەیا ئەلگەرمە د یارییەكا ئاگرین دا و تاقیكرنەكا بهێز بۆ ئەلهۆیێن چیا، خودانێن ئەردی سەرێ لیستەیا خولێ دهێت ب كۆمكرنا 24 خالان ژ حەفت سەركەفتن، سێ وەكهەڤی و ئێك خوسارەتی هەیە، ژلایێ خوەڤە یانەیا دهۆكێ 15 خال كۆمكرینە ل ڕێزا نەهێ دهێت ژ سێ سەركەفتن، شەش وەكهەڤی و دو خوسارەتی هەنە، د یارییا بۆری دا دهۆكێ شیابوو سەركەفتنەكا مەزن ل سەر كارەبا بینت ب پێنج گۆلان بەرانبەر دو گۆلان، ژلایێ خوە ئەلگەرمە تووشی ئێكەم خوسارەتی د خولێ دا بوو.
ڕاهێتەرێ دهۆكێ یاری ب سانەهی نابینیت
د پرێسكۆنفرانس دا سلێمان ڕەمەزان ڕاهێنەرێ تیما دهۆكێ ئەركێ تیما خوە ب سانەهی نابینیت و گۆت: یاری بەرانبەر خودانا سەرێ لیستێ ب سانەهی نینە ژبەركو دناڤ ئەرد و جەماوەرێ خوە دایە و یاریزانێن خودان شیان هەنە، لێ یاریزانێن مە ژی دێ ب مورالەكا بلند هێنە دناڤ یاریگەهێ دا و هیڤی و ئارمانجا مە سێ خالێن یاریێ یە و هەڤڕكین بۆ سەركەفتنێ، دڤێت ب هوشیاری سەرەدەریێ ل سەر ڤێ یاریێ بكەین، لایەنێ هونەری و دەرۆنی تیما مە یا بەرهەڤە، بۆ خاترا پشتەڤانێن دهۆكێ ئێدی هەموو شیانان ب كارئینین دلێ وان خۆش بكەین.
زاخۆ چاڤ ل سەركەفتنا چوارێ یە
ژلایێ خوەڤە تیما یانەیا زاخۆ دێ ل شەمبیا بهێت ل یاریگەها میسان بیتە مێڤانا یانەیا نەفت میسان ئەوا دێ ل دەمژمێر 4:30 ئێڤاری هێتە كرن، كوڕێن خابووری ئەوێن دێ ب مۆرالەكا بلند هێتە دناڤ یاریگەهێ دا پشتی دیارییا بۆری د كلاسیكۆیا كوردستانێ دا سەركەفتن ل سەر هەولێرێ ئینایی و خالێن خوە گەهاندینە 12 خالان پێشڤە هاتە ڕێزا 15ێ ژ سێ سەركەفتنان، سێ وەكهەڤی و پێنج خوسارەتی هەنە، ئەڤ سەركەفتنە ب ڕامانەكا دەستكەڤت و ڤەگەڕیان بۆ هەڤڕكیێن خولێ بوو، ژلایێ خوەڤە یانەیا نەفت میسان بتنێ هەشت خال هەنە لڕێزا 19ێ و بەری دووماهیێ دهێت.
كاپتنێ تیمێ گەشبینە
د پرێسكۆنفرانس دا ئەمجەد عەتوان كاپتنێ تیما زاخۆ گۆت: پشتی سەركەفتنا بۆری دەرۆنێ یاریزانان ئارام بوویە و ئەو گڤاشتنێن پێشتر نەماینە، د نوكە دا ئەم د قووناغەكا نوو داینە، ئەوژی بۆ هەر یارییەكێ دڤێت ئاست و ئەنجامێن باش بینن، ڕاستە تیما بەرانبەری مە یا ل ڕێزا بەری دووماهیێ لێ ئەم كێماسیێ بۆ چو تیما نا دانین و دڤێت بەردەوامیێ بدەینە ئەنجامێن باش، بتنێ سەقایێ یاریێ دێ ئاست و ئەنجامێ یاریێ دیاركەت، دڤێت هەموو شیانێن خوە بمەزێخیت بۆ ب سێ خالان ڤەگەڕیت بۆ بەردەوامییا هەڤڕكییێ.
كلاسیكۆیەكا دی یا كوردستانێ
سوبەهی رۆژا ئەینی یاریگەها شەهید فرانسۆ حەریری ل هەولێرا پایتەخت دێ كلاسیكۆیا كوردستانی دناڤبەرا خودانێن ئەردی یانەیا هەولێر و یانەیا غازئەلشیمال یا كەركووكی ل دەمژمێر 7:30 شەڤ هێتە كرن، یانەیا پایتەختی ل ڕێزا پێنجێ دهێت ب كۆمكرنا 18 خالان ژ پێنج سەركەفتن، سێ وەكهەڤی و سێ خوسارەتیان، ژلایێ خوەڤە غازئەلشیمال 14 خال كۆمكرینە ب سێ سەركەفتن، پێنج وەكهەڤی و سێ خوسارەتیان، دڤێ یاریێ دا هەولێر دێ بزاڤێن قەرەبوویا خالێن یارییا بۆری كەت و ژلایێ خوەڤە یانەیا كەركووكێ دێ بزاڤێن بەردەوامییا سەركەفتنان كەت.
نەورۆز دیدارەكا ئاگرین یا هەیی
شەمبییا بهێت ل دەمژمێر 7:30 شەڤ یانەیا نەورۆز یاسلێمانییێ دێ ل پایتەختێ ئیراقێ بەغدا بیتە مێڤانا یانەیا شورتە د یارییەكا ئاگرین دا، نوونەرا سلێمانییێ د ڕەوشەكا باش دایە ئەوا 19 خال كۆمكرین ل ڕێزا چوارێ دهێت ژ پێنج سەركەفتن، چار وەكهەڤی و دو خوسارەتیان، ژلایێ خوەڤە یانەیا شورتە ل ڕێزا سێیێ دهێت ب 20 خالان، دێ شەڕێ سێ خالان و ڕێزبەندیێ بیت.
شرۆڤەكارەكێ وەرزشی بووچوونەكا جودا هەیە
د دیدارەكێ دا بەسام رەئووف شرۆڤەكارێ بەرنیاس بۆ خولا ستێرێن ئیراقێ گۆت: پشتی بۆرینا 11 گەڕان ژ خولێ گوهۆڕینێن بەرچاڤ دناڤ ئاستێ كۆمەكا یانەیان پەیدابوویە و هەروەسان هندەك ئەنجام یێن نەچاڤەڕێ كری هاتینە پێش، ئەڤە ژی ڕامانا وێ یەكێ ددەت كو ئاستێ هۆنەری و تەكتیكی بەر ب باشتر بوویە، لەوما ژی یاریێن ڤێ گەڕێ دێ ئەنجامێن وێ ژی ب زەحمەتبن بۆ هەر یانەیەكێ و دێ یاریێن ڤێ گەڕێ بهێزن، دهۆك بەرانبەر خودانا سەرێ لیستێ یە، نەورۆز بەرانبەر شورتەیە دو دیدارێن بهێزن، یانەیا زاخۆ دێ دگەل تیما نەفت میسان كەت لێ ئەنجامێ سەركەفتنێ یێ گەرنتی نینە، سەرەرایی زتاخۆ باشترە.
ژ یاریێن دی یێن گەڕا 12ێ
ئەڤرۆ رۆژا پێنجشەمبی 29-10-2026
مووسل- ئەلجولان، یاریگەها زاخۆ، ل دەمژمێر چارێ ئێڤاری.
نەفت- كارەبا، یاریگەها كەرخێ، ل دەمژمێر(4:45) ئێڤاری.
جەوییە- مینا، یاریگەها ئەلمەدینە، ل دەمژمێر(6:30) شەڤ.
یاریێن رۆژا ئەینی 30-10-2026
كەربەلا- تەلەبە، یاریگەها كەربەلا، ل دەمژمێر (4:45) شەڤ.
یارییچن رۆژا شەمبی 31-10-2026
دیالا- زەورا- هاتە پاشئێخستن.
كەرخ- ئەلغراف، یاریگەها كەرخ، دەمژمێر حەفتی شەڤ.
پێنج گۆلكەرێن ڕێزبەندییا پێشیێ
1- یونس حەمۆد حەفت گۆل، یانەیا دهۆك.
2- سەیف رەشید حەفت گۆل، یانەیا تەلەبە.
3- محەمەد جەواد شەش گۆل، یانەیا جەوییە.
4- هێران ئەحمەد پێنج گۆل، یانەیا زەورا.
5- ئیگۆر هێنریگ پێنج گۆل، یانەیا دهۆك
هەلوەستێ گشتی یێ ڕێزبەندیێ بەری دەستپێكرنا یاریێن ڤێ گەڕێ
1- ئەلگەرمە 24 خال.
2- نەفت 22 خال.
3- شورتە 20 خال.
4- نەورۆز 19 خال.
5- هەولێر 18 خال.
6- زەورا 18 خال.
7- ئەلجولان 17 خال.
8- تەلەبە 17 خال.
9- دهۆك 15 خال.
10- مینا 15 خال.
11- غازئەلشیمال 14 خال.
12- دیالا 13 خال.
13- جەوییە 12 خال.
14- مووسل 12 خال.
15- زاخۆ 12 خال.
16- ئەلغراف 10 خال.
17- كەرخ نەهـ خال.
18- كارەبا هەشت خال.
19- نەفت میسان هەشت خال.
20- گەربەلا شەش خال.