دیرۆک دێ مینیت، لێ سۆز کێمبوویە
قەیس وەیس
پشتی هاتیە ڕاگەهاندن کو کاپتنێ یانەیا دهۆک هارون ئەحمەد هاتە ڤەگوهاستن بۆ یانەیا زاخۆ، کارڤەدانێن جودا د ناڤ جەماوەرێ یانەیا دهۆکێ دا پەیدابوون، ژ لایەکی ڤە نەرازیبوونێن توند ژ لایێ جەماوەری ڤە بۆ یاریزانی دروست بوون؛ هندەکان ئەڤ چەنده وەک خیانەت و بێ نان و خوێ قەلەمدا و گەلەک ئاخفتنێن زڤر ئاراستەی وی کرن، وان هەمی خزمەتا وی یا چەندین سالێن بووری لێکدانی چنەکر و ئەگەرێن ڤێ چەندێ زڤراندن بۆ نە وەفاداریا کاپتنێ تیمێ کو بەر ب هەڤرکا دیرین یا دهۆکێ چوو بێی کو چ هزرەکێ بۆ جەماوەرێ خۆ بکەت.
ژ لایەکێ دی ڤە، چەندین جەماوەران پیرۆزباهی لێکر و داخازا بەختەکێ باش بۆ کر د کاروانێ وی یێ نوی دا و سوپاسیا خزمەت و دەستکەفتێن وی یێن د سەردەمێ کابتنیێ دا هاتینە دیارکرن کر، ئەڤ لایەنە ب بهانەیا هندێ تەماشەی بابەتێ دکەت کو وەرزش ب ڤی شێوەیە و د جیهانا پیشەکاریێ دا چەمکێن وەکو وەفاداری و کوڕێ باژێری نەماینە و هەر دەمێ گرێبەستەکا باشتر بۆ هەر یاریزانەکی هات، دێ بەر ب بەرژەوەندیێن خۆ چیت.
بۆچوونا مە ل سەر ڤێ گۆڕانکاریێ:
ب دیتنا مە، چوونا هارونی ڕاستەوخۆ بۆ یانەیا زاخۆ کو هەڤرکێ سەرەکی و کەڤن یێ دهۆکێیە د فوتبۆلێ دا وەکۆ بریندارکرنا هەستێن جەماوەری دهێتە دیتن، ئەگەر چوونا وی بۆ هەر یانەیەکا دی با، دا یا ئاسایی بیت، بەلێ چوونا وی بۆ زاخۆ وەکۆ کێمکرن ژ مێژووا وی وەکۆ کاپتن ل دەف جەماوەری دهێتە هەژمارتن، چونکی ل دەف هاندەران «وەفاداری بۆ درێسێ یانەیێ» ژ پارە و گرێبەستان گەلەک مەزنترە.
بەرۆڤاژی ڤێ چەندێ، ئەگەر ب چاڤەکێ واقیعی و سەردەمیانە سەحکەینێ، سەردەمێ «ئێک یانە بۆ هەمی ژیانێ» د خولا ستێرێن ئیراقێ دا نەمایە. یاریزانی دەمەکێ دیارکری و کورت یێ کاروانی یێ هەی، کو پێدڤییە د بەرژەوەندیا دارایی و داهاتیێ خۆ و خێزانا خۆ دا بڕیارێ بدەت. لەوما مافێ وی یێ سروشتییە ئەگەر گرێبەستەکا باشتر بۆ هاتبیت، دۆژمناتیێ نەکەت و پاشەڕۆژا خۆ هەلبژێریت.
ل دووماهییێ دێ بێژین: تەپاپێ یا سەردەم سۆز تێدا کێم بووینە، بەڵێ مێژوو نامریت، دیسان مافێ جەماوەرییە خەمگین و دڵگران بیت، بەڵێ پێدڤییە ئەڤ تووڕەبوونە نەگەهیتە ئاستێ زێدەگاڤیێ، چونکی هارونی د سالێن بووریدا خزمەتا یانێ کرییە و خوین و عەرەق بۆ رێتی.
