دێ بزڤڕە
هشیار ئیبراهیم
دگەل چوونا تە
ئاوازێن دلێ من
تازییا سەمایێ دکرن
پەیڤان د گەوریا من دا
ژ نەدیتنا ژیانێ حەز دکرن
هەستێن من
شەڤنڤێژا خوە بەتال دکرن
هەناسەیا من
ژ کنفا سێدارێ
دهاتە ماچیکرن…
خەیالێن خەونێن من
بۆ مرنی
دهاتنە بانگکرن…
وارێن من
مێژوویا خوە
بەروڤاژی تۆمار دکرن…
ژیان د بەرویکێن خەونێن من دا
دهاتە ناسکرن
ژین و مرن
د باوەشا خۆ دا
دهاتنە زیندانکرن!
ڤێجا دێ ب زڤڕەڤە
دا د ژیانێ دا
نەهێ یە گونەهباركرن.
