دێ دەنگێ وەلاتێ خوە گەھینمە جیھانێ
ئەڤرۆ، نزار مەجید:
ستران مایی سندی ژدایک بوویا سالا 1991 یە، ل باژێرێ ستۆکھولمێ پایتەختێ سویدێ ھاتیە سەردونیایێ، خواندنا خوە یا سەرەتای و ناڤنجی و ئامادەیی ل دەرڤە ی وەلاتی ب دووماھی ئینایە و نوکە خواندنا خوە ل کولیژێ ل پشکا زانستێن تاوانان بەردەوامیێ پێ ددەت و ستران فەرمانبەرە ل فرۆکخانەیا ستۆکھۆلم، ژبلی ڤێ چەندێ ژی وەکو کچەکا ھەلبەستڤان ھاتیە نیاسین و ب ھەرسێ زمانێن سویدی و کوردی و ئنگلیزی ھەلبەستان د نڤیسیت و ھندەک ژێ بەلاڤکرینە.
سترانێ ل دۆر حەزا نڤیسینا ھەلبەستێ دیار کر کو ھوکارێ سەرەکێ دایکا وێ بوویە، دەمێ نەخوەش بووی نەزانی دێ چاوا ھەستا خوە دەربریت ئینا ب رێیا ھەلبەستێ پەیڤ د ڤەھاندن و ژ وی دەمی وەرە تا نوکە بەردەوامی پێ دایە و نوکە ژی ب ھەلبەستێن خوە یێن وەلات پارێزیی دنڤیسیت ، ھەروەکی ناڤھاتیێ دایە زانین کو نەخاسمە قوناغا ئەڤرۆ یا کوردستان تێدا دەرباز دبیت ل گەل شەرێ توندرەوێن داعش ئەڤ چەندە بوو پالدەرەک بشێم پتر گرنگیێ ب ھەستا نەتەویی بدەم دەربارەی چاپکرنا پرتووکەکێ وەک پرۆژە سترانێ گۆت: جاری من ھزر د ھندێ دا نەکریە، لێ ب دیتنا وێ باشترین رێ بەلاڤ کرنا پارچەیێن ڤیدیۆیێ و ھەڤپەیڤینێن رادیۆ و تەلەفزیۆنا یە و پتر و زووتر دگەھیتە ھەموو تەخێن جڤاکی، لێ وەکو پرتووک ب تنێ کەسێن رەوشەنبیرو ئەکادیمی دخوونن، دەربارەی گرنگیا وەرگێرانا ھەلبەستێ ب زمانەکێ دن سترانێ گۆت :گەلەکا گرنگە دا کو بشێی ب رێیا ھەلبەستێ ئێش و ئازارێن مللەت و نەتەوا خوە بۆ گەلێ جیھانێ ب دەیە نیاسین و نوکە ئەز وەک ستران ب سێ زمانان ھەلبەستان دنڤیسم و دخوونم و من پشکداری د چەندین بزاڤێن ئەدەبی دا کریە ل وەلاتێ سویدێ.
ل دووماھیێ گۆت: گەلەکا گرنگە کا چاوا پێشمەرگە بەرەڤانیێ ژئاخ و ناسناما ھەر تاکەکێ کورد دکەت، وەسا ل سەر ھەر کەسەکێ کورد پێدڤیە دبیاڤێ کارێ خوە دا بەرەڤانیێ ژنەتەوا کورد بکەت.
