دێ گەلەک گوهۆڕینان کەین
ب، سهرجان مەحمود:
دوهی ل ئەنقەرە پایتەختێ تورکیا کۆنگرەیێ پێنجێ یێ نەئاسایی یێ دەم پارتی دەستپێکر و تونجەر باکرهان هەڤسەرۆکێ دەم پارتیێ دیار کر، وەکو دەم پارتی ئەو دێ دەست ب بزاڤەکا مەزن یا کۆمارا دیموکراتی ل تورکیا کەن و گۆت: (ئێدی ل تورکیا سەردەمەک نوو دەستپێکریە و کەس نەشێت بێی کوردان بەحسێ پاشەرۆژا تورکیا بکەت، کورد دێ بنە شریکێ کۆمارا دیموکراتی یا تورکیا و کورد دێ د کۆمارا نوو دا گەهنە هەموو مافێن خوە، وەکو دەم پارتی ئەم دێ دەست ب بزاڤەکا مەزن بۆ کۆمارا دیموکراتی ل تورکیا کەین).
هەڤسەرۆکێ دەم پارتی دیار کر، ل تورکیا سەردەمێ ئینکارکرنا کوردان ب دووماهی هاتیە، نها هەر کەس دزانیت ب ئینکارکرنا کوردان ئەو نەشێن بگەهنە چو ئارمانجێن خوە، هەروەسا نها گرنگە ئێدی کورد ژی وەکو تورکان بگەهنە هەموو مافێن خوە و دەم پارتی دێ بیتە پارتەکا گەلەک مەزن و بهێز و مە دڤێت تورکیا برێڤە ببەین و ئەو یەک ژی نیشا ددەت کو ئارمانجا دەم پارتی پارچەکرنا تورکیا نینە.
ل ئالیێ دی تولای هاتیم ئۆغۆللاری ژی دیار کر، قووناغەکا نوو بۆ ئاشتیێ و پێکڤەژیانێ ل تورکیا دەستپێکریە و کورد دێ بنە فاکتەرێ سەرەکی یێ دیموکراسیێ ل تورکیا و ئێدی کەس نەشێت بێی پشتەڤانیا کوردان ل تورکیا بهێتە سەر دەستهەلاتێ و کورد دێ ب هەموو رەنگەکێ کار بۆ ئاڤاکرنا کۆمارا دیموکراتی کەن و وەکو دەم پارتی وان ب کۆنگرەیا خوە یا نوو ل ئەنقەرە دەست ب بزاڤەکا نوو کرینە و دێ گەلەک گوهۆڕینێن مەزن و بگەهین ل تورکیا روو دەن و دڤێت هەموو ئالی خوە بەرهەڤ بکەن.
