دەرگەهــ

هەژین فەرەج

هەمی ئیڤارا، دەمێ تاڕیێ کۆمەلگەهـ دنخافتی، دایک دچوو و ل بەر دەرگەهی دڕوینشت. نە چاڤەڕێ یا چ مێهڤانان بوو؛ بەلكو بتنێ دا ئەو دەرگەهـ ل بەر چاڤێ وێ بیت.
ئەو چەند سال دەربازببوون، زەلامێن مالێ نە ڤەگەڕیابوون، پشتی وێ رۆژا ڕەش یا چوون و نەهاتنێ، ب تنێ دەنگێ وان مابوو.. رەنگێن وان… روحێن وان و ڤیانا وان… وێ دایكێ دزانی ڤەگەڕیانا وان ب زەحمەتە، لێ هەر شەڤ دەرگەهە ب تەمامی نە دادئێخست.
زارۆکێ وێ جارەکێ ژێ پرسیاركر:
– دایێ، بۆچی دەرگەهــ هەر ڤەکرییە؟
دایک بۆ ماوەیەکی کورت بێدەنگ ما و پاشی گۆت:
– ئەگەر بابێ تە ڤەگەڕیا، نابیت ل پشتی دەرگەهی گەلەك بمینیت.
سال چوون و سال هاتن و زارۆک مەزن بوو، دەرگەهـ هەر وەکی خۆ ما. ڕۆژەكێ دەمێ دایك نەخۆش بووی و كوڕێ وێ هاتی ل بەر دەرگەهێ مال و دیتی دەرگەهــ هێشتا نیڤ ڤەكرییە، بۆ ئێكەم جار تێگەهشت كو دایكێ دەرگەهـ نیڤ ڤەكری دهێلا نە ژبەركو دێ باب ڤەگەڕیت، بەلكو ئەو واتا بوو كو هندی دایك ساخبیت چ كەسێن دی ژ مالێ نەچیت بێ ڤەگەڕیان.
کوڕێ وێ ب بێدەنگی چوو و دەرگەهــ دائێخست. پاشی، بۆ جارا ئیكێ، ل هەمان جهێ دایک هەمی شەڤا لێ دڕوینشتی، ڕوینشت.
دەرگەهـ هات گرتن، راستە دەرگەهــ هاتن گرتن…
لێ چاڤەڕێبوون هەر ڤەكری ما.

کۆمێنتا تە