دەزگەهێ خێرخوازی یێ بارزانی دێ هندەك پـڕۆژەیان ل شنگالێ ئەنجام دەت
بەرپرسێ دەزگەهێ خێرخوازی یێ بارزانی ئۆفیسا شنگالێ دیاركر، وان لبەرە چەندین پڕۆژەیێن جودا ل شنگالێ ئەنجام بدەن و دبێژیت: ب رێیا ڤان پڕۆژەیان دێ دەلیڤەیێن كاری بۆ خەلكێ دەڤەرێ پەیدا كەین.
شێرۆ جۆقی، بەرپرسێ دەزگەهێ خێرخوازی یێ بارزانی ئۆفیسا شنگالێ بۆ رۆژنامەیا ئەڤرۆ گۆت: «د چارچۆڤێ پێشكێشكرنا هاریكارییان دا بۆ خەلكێ كێمدەرامەت، یەكەیەكا ساخلەمییا ددانان ل كۆمەلگەها زۆرئاڤا و دەوروبەران هاتییە ڤەكرن، زێدەباری ئاڤاكرنا خانییان بۆ ڕزگاربوویان و خێزانێن هەژار، نوكە ئەڤ پرۆسەیە بەردەوامە و ئەو خەلكێ ڤەگەڕیایە شنگالێ، زێدەتر پێدڤی ب دەلیڤەیێن كاری هەیە، مە ل بەرە چەند پڕۆژەیێن جودا ئەنجام بدەین، ژ وان ژی: ڤەكرنا جهەكێ ئاسنگەرییێ، كو چەند گەنج دێ تێدا كاركەن و ژێ مفادار بن».
