دەستنیشان کرنا راھێنەرا فوتسالا زێرەڤانی مایە د ناڤبەرا رەخنە و پشتەڤانیێ دا
راھێنەرێ زانکویا دھۆک: ھەلبژارتنا راھێنەران سەر پەیوەندی و ھەڤالینیا دھێتە ھەلبژارتن
رۆژنامەڤانەکێ وەرزشی: ئەڤ بریارا کارگێریا یانێ مەترسیا خوە ھەیە
راھێنەرەکێ فوتسالێ: راھێنەرا زێرەڤانی بەری نوکە چ سەربور نین
سەرپەرشتا زێرەڤانی: نالە سوپەر تایبەت مەندا ب یاریا فوتسالێ
چریسک: راھێنەرا زێرەڤانی کارێ وێ کێمتر نابیت ژ راھێنەرەکێ کور
ئەڤرۆ، زنار زوبێر:
جادەیا وەرزشی ھوسا دبینن کو دەستنیشان کرنا راھێنەرا فوتسالێ بۆ تیما کچێن زێرەڤانی پێدڤی ب راھێنەرەکێ خودان سەربور ھەیە و یاریەکا ب زەحمەتە نە ھەر کەسەک دێ شێت راھێنەریا ڤێ یاریێ کەت و سەرەدەریا تیما کچان تایبەتمەندیا خوە ھەیە و نوکە راھێنەر لسەر پەیوەندیان دھێنە دانان.
ل دەسپێکێ فرەیدون عەبدولقادر ماموستا و راھێنەرێ یاریا فوتسالا زانکویا دھۆک بۆ رۆژناما ئەڤرۆ گۆت: کەس د بابەتی ناگەھیت کا لسەر چ بنەما راھێنەر دھێتە ھەلبژارتن و کا چەوا پلان بۆ دارشتیە لێ وەک دیار ھەلبژارتنا راھێنەری نوکە کەفتیە سەر پەیوەندیان و ھەڤالینیا کەسوکی لەورا دبینم یانا زێرەڤانی ژی بۆ ڤێ بریارێ کەفتیە ڤێ شاشیێ ژ بەرکو راھێنەرا نوکە ھاتیە دەستنیشان کرن نالە سوپەر قوتابیا من بوو ل زانکویا سلێمانیێ ل سالا ٢٠٠٨ و بەری نوکە یاریزانا گورەپان و مەیدانێ بویە و من نە دیتیە نالە سوپەر یاریا فوتسالێ کربیت.
ناڤبری ئەو چەندە ژی دیارکر پێدڤیە راھێنەر خودان سەربور بیت و بزانیت دێ چاوا سەرەدەریێ ل گەل یاریکەران بکەت تایبەت یێن کچ ئەوێن ستێر ئەڤ چەندە یا ب ساناھی نینە و یاریا فوتسالێ ب زەحمەترین یاریە بۆ راھێنەران تایبەت یێن خودان سەربور.
ھەر دڤی چارچوڤەی دا خەیری ئەحمەد راھێنەرێ بەرێ یێ فوتسالا زێرڤانی دیارکر نورمالە و مافێ یانێ یە بڤێت ھەر راھێنەرەکی ژ جھەکی بینت لێ پێدڤی بوو زێدەتر ئەڤ ئەرکە بۆ راھێنەرەکێ پارێزگەھا دھۆکێ بایە کو دەرفەتا خوە وەرگریت، مەرج نینە یاریکەرەکا خودان شیان بیتە راھێنەر لێ پێدڤیە تا چ رادە دێ سەربور ھەبیت ژ بەرکو یاریەکا ب زەحمەتە ھەتا ل وەلاتێن پێشکەفتی ژی ڤی ئەرکی دەنە راھێنەرێن خودان سەربور دیسان نە لگەل وێ بوچونێ مە کارگێریا یانا زێرەڤانی بریار دای راھێنەرا تیما کچان دڤێت کچ بیت ژبەرکو لسەر ئاستێ جیھانی ژی راھێنەرێن تیمێن کچان زوربەیا وان زەلامن ژبەرکو ئەو دێ شێت کارکەت بۆ پاشەرۆژا تیمێ بۆ دروستکرنا یاریزانانو خاندنا وی بۆ پەلانا یاریێ دیسان سەرەدەری ل گەل سەرپەرشتێن یاریا و دادڤانان راھێنەرێ کور دێ شێت زێدەتر رولێ خوە بینت دیسان زێدەتر دێ شێت کەسایەتیا خوە لسەر تیمێ سەپینیت لێ مەرەما من نە ئەوە رولێ راھێنەرا نوو یا زێرەڤانی و بریارا کارگێریا یانێ کێم بکەم تنێ وەک جادا وەرزشی من بوچونا خوە دیارکریە و ھیڤی دکەم بابەتی ب کەسوکی وەرنەگریت.
ژلایێ خوە ڤە سەرکەفت رەشید راھێنەرێ بەرێ یێ فوتسالا کچێن گارە بۆ رۆژناما ئەڤرۆ گۆت: گوتنەکا مەزنا یا ھەی بێژیت (تە سەربور یان تە عاقل) ل ڤێ مەرەما من ئەوە دەستنیشان کرنا راھێنەری بۆ تیما کچان پێدڤی ب کەسەکێ خودان شیان و سەربور ھەیە و نە ھەر کەسەک دێ شێت ڤی کاری ئەنجام دەت و دبیت یا سەرکەفتی بیت ژبەرکو چ کەس د ڤی دەمی دا ئەرکێ راھێنەراتیا تیما کچێن زێرەڤانی وەرگریت دێ ئەنجامێنباش دەستخوە ڤە ئینت لێ کا دێ چەوا شێت بۆ سالێن بھێت تیمەکا نوو دروست کەت و سەرپەرشتیا تیما کچان پێدڤی ب شیان و زیرەکیێ ژبەرکو سەرەدەریا ل گەل یاریزانێن کچ تایبەتیا خوە ھەیە و تایبەت نوکە دبیت رێز ل راھێنەرا خوە نەگەریت ئەگەر ھەمی یاریزان کچ بن و شیانێن وان ژ راھێنەری باشتر بیت لەروا دبینم ئەگەر راھێنەر نوو یا زێرەڤانی نالە سوپەر ژ دەسپێکێ وەک ھاریکارا راھێنەری بایە دا بو وێ سەربور پەیدابیت ژبەرکو ئەڤ بریارا کارگێریا یانێ مەترسیا خوە ھەیە دبیت یا سەرکەفتی بیت یان بەروڤاژی.
بەرامبەر ڤان گۆتنان چریسک یونس سەرپەرشتا یاریێن کچان ل یانا زێرەڤانی بۆ رۆژناما ئەڤرۆ گۆت: سوپاس بۆ ھەر کەسەکێ رەخنێ ل یانێ و تایبەت تیما کچان بکەت ژبەرکو دێ رەخنە دێ ئاستێ تیمێ بەر ب باشتر بەت دیسان کارەکێ باشتر ھێتە کرن لێ من دڤێت بێژم دەستنیشان کرنا ستافەکی کچ بۆ سەرپەرشتیا تیما فوتسالا کچان پشتی چەندین گەنگەشە و وەرگرتنا بوچونان و دانانا پلانەکێ بویە و راھێنەرا نوکە نالە سوپەر تایبەت مەندا یاریا فوتسالێ یە و کەسەکا مەیدانی و ئەکایمیی یە د وەرزشی دا و باوەرناما ڤێ یاریێ ژ وەلاتێ نەرویژ وەرگرتیە دیسان یاریکەر بویە ل گەل یانێن پێشمەرگەیا ھەولێر و سلێمانیێ و سیروانا نوێ دیسان دەرچویا کولیژا پەروەردا وەرزشی یە و ھەمی بەلکە ژی بەرھەڤن بۆ سەلماندنا ڤێ چەندێ کو چەندین جورێن وەرزشی کرینە، بەری ڤێ بریارێ پشتی چەندین کومبونان مە چو راھێنەرێن تایبەتمەند ب یاریا فوتسالێ کو باوەرناما ڤێ یاریێ ھەبیت نینن ل پارێزگەھا دھۆکێ و ئەو راھێنەرێن ھەین ژی ھژمارەکا وان یاریکەرێن یاریزانێن تەپا پێ بوینە کو ھەتا رادەیەکێ مەزن لگەل فوتسالێ ناگونجیت.
زێدەتر چریسک ئەو چەندە ژی دیارکردبیت ئەنجام دەستڤە نەھێت باشترین گروڤە لسەر ڤێ چەندێ ل وەرزێ بوری یانا زێرەڤانی لسەر ئاستێ یاریا تەپا پێ یا کوران و کچان باشترین یاریکەر و پشەکار ھەبون ل گەل مەزاختنا پارەکێ زور نەشیان ئەنجامان دەستخوە ڤە بینن و دبینم ھەمی مەرجێن سەرکەفتنێ لدەف راھێنەرا نوکە یا تیمێ نالە سوپەر ھەنە و پەیوەندیێن وێ لگەل ھەمی یاریکەرێن ھەرێما کوردستانێ کارێ وێ کێمتر نابیت ژ راھێنەرەکێ کور راستە ئەڤ راھێنەرە لسەر ئاستێ پارێزگەھا دھۆکێ وەک وەرزشڤان نە یا بەرنیاسە لێ باژێرێن ھەولێر و سلێمانیێ وەرزشڤانەکە ناڤێ خوە ھەیە و دبینم راھێنەرەکا ژ ھەژی بۆ تیما کچان لێ من دخواست جادا وەرزشی ب گشتی ھەمیان باشتر پێزانین لسەر نالە سوپەر کومکربان پاش رەخنەیا مە کربایە دیسان ھیڤی دکەم پشتەڤانیا ڤێ بریارا کارگێریا یانێ بھێتە کرن کو بۆ جارا ئێکێ یە راھێنەرەکا کچ ڤی ئەرکی وەردگریت.