دەست ب تەمامکرنا پرا دەلال ھاتەکرن
ئەڤرو نیوز : نەوزاد زادە ھلوری:
ژبەر قەیرانا دارایی نێزیکێ سالەکێ کارکرن لسەر پرا دەلال ل زاخۆ ھاتبوویە راگرتن ، ئەڤرۆ جارەک دن دەست ب تەمامکرنا نوژەنکرنا وێ وێ ھاتەکرن.
دڤی واریدا بێوار سندی بەرپرسێ راگەھاندنا گەشت و گوزارا قەزا زاخۆ بۆ ئەڤرو نیوز گۆت: (پرا دەلال ل زاخۆ کو ب سوومبوول و ھێمایێ دیروکی و شارستانیا کوردستانێ و زاخۆ دھێتە نیاسین ، و ئێکە ژ جھێن شینواریێن ھەری گرنگ ل باشوورێ کوردستانێ ، و ژبەر گرنگی یا پرێ رێڤەبەریا شینوارێن زاخۆ و باژێرڤانیا زاخۆ دەست ب نوژەنکرنا وێ کر ، بەلێ ژبەر قەیرانا دارایی نەشیان بەردەوامیێ بدەن نوژەنکرنا وێ ، و ئەڤرۆ جارەک دن رێڤەبەریا شنوارێن زاخۆ دەست ب تەمامکرنا نوژەنکرنا وێ کر و تنێ ٢٥% ژلایێ روژئاڤایێ پرێ مایە کو بھێتە نوژەنکرن)
زێدەتر گۆت: (پرا دەلال ژبلی کو جھەکێ شینواری و دیروکی و شارستانی یە د ھەمان دەم دا جھەکێ گەشت و گوزاری یە و سالانە ھەزاران خەلک ل ھەموو دەڤەرێن کوردستانێ سەرەدانێ بو دکەن ، ژبەرڤێ مە وەکو رێڤەبەریا گەشت و گوزاری یا زاخۆ ل گەل جھەتێن دن یێن پەیوەندیدار پروژەیەکێ گەشت و گوزاری ل بەر بوو کو ل دەردورێن پرێ درۆست بکەین ، بەلێ ژبەرکو پرا دەلال دھاتە نوژەنکرن و دوڤدا قەیرانا دارایی ب سەردا ھات پرۆژە ھاتیە راگرتن ، بەلێ رێڤەبەریا گەشت و گوزارا زاخۆ لسەر ھەولێن خوە د بەردەوامە و ب زوترین دەلیڤە ئەو پرۆژە دێ ھێتە چێکرن)
