دەم ھاتییە بۆ کوردستان و ئیراقێ ھەر ئێک بچیتە سەر رێیا خوە
ئەڤرۆ نیوز:
فەلاح مستەفا، بەرپرسێ فەرمانگەھا پەیوەندیێن دەرڤە یا حکومەتا ھەرێما کوردستانێ گۆتارەکا کورت ب زمانێ ئنگلیزی د رۆژنامەیا واشنتۆن تایمز دا ب ناڤونیشانێ (دەم ھاتییە بۆ کوردستان و ئیراقێ ھەر ئێک بچیتە سەر رێیا خوە) بەلاڤ کرییە و ئەڤە دەقێ وێ ب کوردی یە:
ھێزێن ئێمناھییا ئیراقێ ب پشتەڤانییا ھەڤپەیمانییا دژی داعشێ ژ ئارمانجا خوە یا ژناڤبرنا رێکخستنا تیرۆرستی یا داعشێ ل ئیراقێ نێزیک بووینە، ئەو ژی پرسیارەکا گرنگ ل دووڤ خوە دئینیت: دێ چ پشتی وێ ھێت؟ رۆنتر ببێژین چ پێکھاتە یا حکومکرنێ دێ گرۆپێن نەتەوەی و ئایینی یێن جودا ل وێ دەڤەرێ پارێزن.
پشکەکا بەرسڤێ دێ ئەڤ سالە د رێفراندۆما ٢٥ ئیلۆنێ دا ھێتە دان، ھەرێما کوردستانێ دێ ژ خەلکی خوە پرسیت کا ئەو پشتەڤانیێ ل سەرخوەبوونا کوردستانێ دکەن، ئەم پێشبینی دکەین پرانی ب “ئەرێ” بەرسڤێ بدەن، سەرۆک مەسعوود بارزانی ژی ئاشکرا کرییە کو رێفراندۆم دی دەڤەرێن ڤەقەتییایی ژی ب خوە ڤە گریت، دا دەلیڤە ب خەلکێ وان دەڤەران ژی بھێتە دان چارەنڤیسێ خوە دیار بکەن.
ئیراقییان ژی کو وەکی کوردان د بن دەستێ رژێمێن ئێک ل دووڤ ئێک دا نالاندییە کو سەرنەکەفتنە د پاراستنا وەلاتیێن خوە ژ زۆرداریێ و توندوتیژیێ، پێدڤییە دەلیڤە ب ئیراقییان ژی بھێتە دان بۆ خوە بریارێ بدەن چ جۆرێ حکومەتێ د شیان دا یە باشترین ئێمناھی بۆ وان دابین بکەت، خوەرێڤەبەری باشترین بەرسڤە.
رێفراندۆم داوییا چیرۆکێ نابیت، گاڤێن دی پێدڤینە بھێنە ھاڤێتن بەری ھەرێما کوردستانێ بریارا سەروەرییا خوە بدەت، پێدڤییە دانوستان د ناڤبەرا بەغدا و کوردستانێ دا بھێنە کرن، د وان دانوستانان دا ئەمریکا دێ رۆلەکێ گرنگ یێ ناڤبەرکارەکێ راست بینیت، ئەمریکا دشیت پشتراستیێ ل وێ یەکێ بکەت کو دانوستان د دادوەرانە و بەرھەمدار بن و باشترین ئەنجام بۆ ھەردو ئالییان بدەستڤە بئینیت.
