دەنگوباسێ سەرهلدانا دهۆكێ گـەهشتە مامێ من و ژ كەیفا دا وەغەركر
دیدار، سالار محەمەد دۆسكی:
4-4
فەیسەل گەردی دیاركر: ل بارەگایێ مە دەستیر دان نەبوون و رێك چیا بوو و زڤستان بوو و باوەركە هەر مووچێ مە بۆ خێزانێن مە دهاتنە هنارتن و هاتن و چوونا مە گەلەك یا كێم و زێدەتر ئەم چاڤەرێی چالاكی و كریارێن پێشمەرگەی بووین و بیرا من دهێت شەرێ دێرەلووكێ دەمێ گەنگو باس دگەهشتنە مە و گەلەك ب مورالەكا بلند ل ئێزگێ دەنگێ كوردستانێ دهاتنە خواندن و ئەو ی دەمی مورالا خەلكێ كوردستانێ و گشت پێشمەرگەی یا بلند بوو، دیسا شەرێ كانی ماسێ گەلەك دەنگ ڤەدا و چالاكیێن لقێ دوو هندەك چالاكیێن مەزن ئەنجامدان دا لێ چالاكیێن هەرە باش ل سنورێ لقا ئێك بوون و زێدەتر دەنگڤەدان و زێدەتر ب قوتر بوو لەقا ئێك و نەبتنێ چالاكیێن لەشكەری هەتا رێكخستن و ئەكتیفتر هەر سنورێ لەقا ئێك بوو و دەمێ دەنگ و باس دهاتنە بەلاڤەكرن خەلكێ مە ل پەنابەریێ هند كەیفا وان دهات دگۆت هندەك مە كوردستان رزگار كر و هندە مە دەولەت چێكر و گەلەك كەیفا وان دهات و گۆتن دێ دەولەتێ چێكەین و زڤرین.
هەمان پێشمەرگە گۆت: ل شۆرەشا گولانێ زێدەتر كاودانێن پێشمەرگەی خوش بوون ژ روویێ ئابووری و چەكی ڤە و زێدەتر پێشمەرگە یێ ئارام بوو و لەوما ئەو پێشمەرگەیێ ل شۆرەشا ئیلۆنێ ماندیبوون و برس دیتی مە ل گولانێ ئەو نمەدیت و ژیان بەرفرەهتر بوو و بتنێ مەترسی ئەو بوو دەمێ مەفرەزەكا پێشمەرگەی هاتبا ئیراقێ و نێزیكی لەشكرێ ئیراقێ و ئەگەر هاتبانە دەستەسەركرن و كاودانێن وان تێكچووبان و هندەك جاران بڤی رەنگی تەنگاڤی بۆ پێشمەرگەی دروست بوو، وەك پێشمەرگایەتی چ جاران نەهاتبوومە ئیراقێ چونكە زێدەتر ل سەركردایەتیێ بووم و ئێزگێ دەنگێ كوردستانێ.
پێشمەرگەیێ شورەشا گولانێ فەیسەل گەردی ئاڤدەل گۆتژی: ل سالا 1975 دەمێ ژ ئیراقێ چووینە ئیرانێ و پشتی بورینا چەند سالەكێن مێم ب كارێن پێدڤی ڤەگەریاینە ئیراقێ و ئەڤە زێدەتر ل پێشمەرگاتیێ بوویە و هەتا سنورێ لقا ئێك هاتبووم.
فەیسەل گەردی ئاڤدەل، پێشمەرگەیێ شۆرەشا گولانێ گۆتژی: دەمێ بەرپرسێ هێزا مە (صەبری نێروەی) شەهید بووی گەلەك بوومن نەخوش بوو و گەلەك پێشمەرگە و هەڤال و كەس و كارێن من شەهید بووینە و هەتا نوكە یێ بۆ عاجزم و جهێ وان هەمیان بەهش بیت و گرنگ بوو زێدەتر چاڤدان ل هەر دو خێزانێن هەر دو تێكوشەران (صەبری و محەمەد تاهر) بۆ هاتباكرن چونكە ئەڤان هەر دو كەسان گەلەك ماندیبوون دیت بوو و گەلەك خزمەتا ڤێ ئاخێ كریە و زێدەتر سەرەدان بۆ بهێنەكرن و پتر بهێنەپێش چونكە ئەڤە رۆژێن سەخت و دژوار چەپەر بوون بۆ كوردستانێ.
پێشمەرگێ شۆرەشا گولانێ فەیسەل گەردی ئاڤدەل گۆتژی: مخابنی ڤە دبێژم ل ئیرانێ وی دەمی كاودانێن مە ل گەل دیموكراتێ ئیرانێ تێكچوویی بوون و لێ هەر نەشیان بەرامبەر هێزا پێشمەرگێ پارتی دیموكراتی كوردستان ب راوستن و هەر دەم ئەم سەركەفتی بووین و پشتی سەرهلدانا پیرۆز ژی هەر شەرەكێ پشكدار بووین و تایبەت ئەو شەرێن چەسپاندنا قانوونێ و پاراستنا ماف و شەرەف و نامیسا كوردستانێ هەر پێشمەرگێن مە سەركەفتی بووینە.
فەیسەل گەردی ئاڤدەل دیاركر: رۆژا گەلەك كەیفا من هاتی و دلێ من خوش بووی ل سەرهلدانا پیرۆزا سالا 1991ێ بوویە و ئەم وی دەمی ل پەنابەریێ بووین و لێ چریسكا دەسپێكا سەرهلدانێ 5/3 ل رانیە و هەتا دووماهیێ هەر 24 دەمژمێران دەنگ و باس گەهشتنە مە و گاڤ بۆ گاڤێ دەڤەرێن كوردستانێ دهاتنە ئازادكرن و گەلەك كەیفا مە دهات و دلێ مە گەلەكێ خوش بوو و ئەو ماندیبوون و ستیان هەمی ژ بیرمە چوو و روندێ، كەیفێن مە دباراندن و مە هزر كر كو بەرهەمێ خەباتا پێشمەرگەی و خوینا شەهیدان ئەڤرۆ ئەمێ ب چاڤ دبینین و ب گوهێن خوە گولێ دبین و ئیرانێ نەهێلا ئاهەنگێن خوشیێ بكەین لێ پا دلێ مە گەلەك خوش بوو و مە زانی بەرهەمێ خەباتا مە یا چەندین سالان هات و مە دیت.
پێشمەرگەیێ شۆرەشا گولانێ فەیسەل گەردی ئاڤدەل زێدەتر گۆت: دەمێ سەرهلدانێ ئەم هاتینە رانیا و دووڤ دا هاتین هەتا هاڤینگەها سەلاح الدین و هێزێن (سەبری) خودێ ژێ رازی بیت ل گەل هێزێن جەنابێ سەرۆك (مەسعود بارزانی) پێكڤە هاتن و دەمێ (سەبری) شەهید بووی كورێ وی (عسمەت) هاتە جهێ وی و پشكداربوو و كەیفا مە گەلەك هات و دەمێ سەركەفتن تینان و هێزا ئیراقێ ئەڤا هندە درندە و مەزن ل سەر دەستێ خەلكی و پێشمەرگەی هاتیە شكاندن و نەمای وی دەمی گەلەك خوش بوو و باژێرێ دهۆكێ دووماهی باژێر بوو هاتیە ئازادكرن كو 14/3/1991 وی دەمی مامێ من (خالد) ل دیانا ل گەل چەند پێشمەرگەی دەوات دكر و دەمێ دەنگ و باسێ سەركەفتنا سەرهلدانێ و ئازادبوونا دهۆكێ گەهشتیێ ئێكسەر دلێ وی هاتەگرتن و كەفت و هەتا گەهاندیە نەخوشخانێ و چارەسەریێن بلەز بۆ هاتینەكرن وی دەمی هند نوژدارێن پێشكەفتی ژی نەبوون و نوژاران گۆتن دلێ ڤی راوستیایە و گیانێ خوە ژ دەست دا و دنیا هەمیێ زانی مامێ من ژ كەیفان دا وەغەركر و بەلێ خوزی دیتبا ب چاڤێن خوە و دەسكەفتێن ئەڤرۆ دیتبان.
فەیسەل گەردی ئاڤدەل هەروەسا گۆت: پشتی شۆرەش و خەباتێن مللەتێ مە بەرهەمێ ئەڤێ خەباتێ مە ب چاڤ دیت و راستە كێماسی هەنە و بۆ نموونە نوكە هاتیمە خانەنشینكرن و مووچێ من و كەسەكێ رەنگە ل دەڤەرەكا دا خەبات كربیت یان هوسا ماندیبوون نەدیت بیت ئەز و ئەوە وەك ئێك مووچەی وەردگرین.
ل دووماهیێ پێشمەرگەیێ شۆرەشا گولانێ فەیسەل گەردی ئاڤدەل گۆت: هیڤیا سەركەفتێ بۆ وەلاتێ خوە كوردستانێ دكەم و ئەف دەسكەفتێن مە هەین بهێ،ە پاراستن و ژ دەستێن مە نەچن چونكە ئەڤە بەرهەمێ خەباتا چەندین شورەش و سەرهلدان و شەهید و پێشمەرگە و عەگید و چاڤ نەتراسانەن و ب گیانێ خوە دێ ئەڤان دەستكەفتان و هەرێما كوردستانێ پارێزین و ئەم پەشێمانێن خەبات و ماندیبوونا خوە نینن و ئەڤە بەرهەمێ خوینا شەهیدان و ژ خودێ دخازین كوردستانا سەركەفتی و ئێكگرتی بیت و كاودانێن نەخوشتر مە دەربازكرینە.
