د ئەڤ سالە دا ٢٥ ترلیون ژ داھاتێ عیراقێ زێدەبوویە و کەس نزانیت چەوا ھاتیە خەرج کرن
ئەڤرۆ نیوز:
راوێژکارێ ئەنجومەنێ ئاسایشا ھەرێما کوردستانێ بۆ کاروبارێن وزێ دیارکر پێدڤیە جڤاتا نوونەرێن عیراقێ د ئەڤ سالە دا بەری بوودجەیا سالا نوو پەسەند بکەن، بوودجەیا خیتامی یا سالا بوری پەسەند بکەن پێخەمەت بزانن ب چ شێوە داھاتێ عیراقێ ھاتیە مەزاختن.
زێدەتر بێوار خنسی گۆت: ل سالا بوری زێدەتر ٢٥ ترلیون دینار ژ داھاتێ عیراقێ زێدەکریە پشتی بھایێ نەفتێ بەر ب زێدەبوونێ چووی، کو ژ وانا ترلیونەک و ٧٠٠ ملیۆن دینار پشکا ھەرێما کوردستانێ یە دیسان پێدڤیە حکومەتا ھەرێمێ نوونەرێ خوە د کومپانیا سومۆ دا ھەبیت داکو ئاگەھداری ھەموو داھاتێ عیراقێ بیت و داکوکیێ ل مافێن ھەرێمێ بکەت.
ناڤھاتی ئەو چەندە ژی دیارکر د پروژە یاسایا بوودجەیا عیراقێ یا گشتی دا ھاتیە رۆژانە عیراق سێ ملیۆن و ٧٨٠ ھزار بەرمیلێن نەفتێ د فروشیت کو ژوانا ٢٥٠ ھزار یێن ھەرێما کوردستانێ یە و بھایێ ھەر بەرمیلەکێ ٤٦ دولارێن ئەمریکی ھاتیە خەملاندن لێ یا دروست حکومەتا عیراقێ د ئەف سالەدا ئێک بەرمیلا نەفتێ عیراقێ ب ٦٠ ھەتا ٧٤ دولاران فروتیە و ب ڤێ چەندێ بوودجا عیراقێ زێدەبوویە کو د سالەکێ دا ٢٥ ترلیون دینار زێدەبوویە و ١٢ ترلیون بۆ کورتھێنانێ بکارھاتیە و ١٣ ترلیون دینار ژی د مینن، کەس نزانت ب چو شێوە ئەڤ کوژمە دھێتە مەزاختن و پشکا ھەرێمێ ژی نە ھاتیە ئەداکرن