د رۆژانێن جه‌ژن دا چار كه‌سان گيانێ خوه ژ ده‌ست دا
ئه‌ڤرۆ نيوز:
د پرێس كونفرانسه‌كی دا رێڤه‌به‌ریا گشتی یا ساخله‌میا پارێزگه‌ها دهۆكێ دیاركر كو پتری 13 هزار نه‌خۆشان سه‌ره‌دانا ده‌زگه‌هێن ساخله‌میێ كرینه ل رۆژانێن جه‌ژنێ و چار كه‌سان گیانێ خوه ژده‌ست دایه و 11 جه ژلایێ زێره‌ڤانیا ساخله‌میێ هاتینه سزادان.
حه‌مزه ره‌زیكی، به‌رپرسێ راگه‌هاندنا ساخله‌میا پارێزگه‌ها دهۆكێ بۆ ئه‌ڤرۆ نيوز دیاركر كو ل رۆژانێن جه‌ژنێ 13741 كه‌سان سه‌ره‌دانا ده‌زگه‌هێن ساخله‌میێ كرینه و 81 كریارێن نشته‌رگه‌ری هاتینه ئه‌نجامدان و چار ژوان كریاران بۆ نه‌خۆشێن سۆتنێ یێن ته‌نگاڤ بووینه.
دیاركر ژی 85 كه‌سان په‌یوه‌ندی ب خزمه‌تا 122 كرینه كو 65 ژوان هاتبوونه ڤه‌گوهاستن بۆ ده‌زگه‌هێن ساخله‌میێ و 20 ژی ل جهێ روودانێ هاتبوونه چاره‌سه‌ركرن.
به‌رپرسێ راگه‌هاندنا ساخله‌میا دهۆكێ دیاركر ژی كو 607 زارۆك ل رۆژانێن جه‌ژنێ ژدایك بووینه كو 302 كچ بووینه و 305 كور و زارۆیه‌ك ژی ل گه‌ل ژدایكبوونێ مری هاتیه سه‌ردونیایێ. ل دۆر گرنگترین روودانان گۆت: 14 روودانێن ترۆمبێلان په‌یدابووینه ل گه‌ل حه‌فت روودانێن ب شه‌رچوونێ و 24 كه‌تن ژبلنداهیێ‌َ.
دیاركر ژی 87 كه‌سان سه‌ره‌دانا نه‌خۆشخانا سۆتنێ و نشته‌رگه‌ریێن جوانكاریێ كرینه و ژبه‌ر دژواریا برینێن حه‌فت كه‌س ژوان ل نه‌خۆشخانێ هاتینه نڤاندن و گۆتژی: سێ كه‌سان ژبه‌ر روودانێن جودا جودا گیانێ خوه ژده‌ستدایه و زه‌لامه‌كێ 60 سالی ژی ژ ئه‌گه‌رێ سۆتنا وی ب رێژا 100% گیانێ خوه ژده‌ستدایه.
ده‌رباره‌ی زێره‌ڤانیا ساخله‌میێ دیاركر كو سه‌ره‌دانا 121 جهێن دكه‌ڤنه ل ژێر كونترۆلا ساخله‌میێ كرینه و 11 جه ژوان ژبه‌ر نه‌پێگیریا وان ب مه‌رجێن ساخله‌میێ هاتینه هوشداریكرن.
به‌رپرسێ راگه‌هاندنا ساخله‌میا پارێزگه‌ها دهۆكێ دیاركر كو كێمترین هژمارا روودانان ل ڤێ جه‌ژنێ هاتیه تۆماركرن، ب تنێ هژمارا نه‌خۆشێن سه‌ره‌دانا ده‌زگه‌هێن ساخله‌میێ كرین و هژمارا په‌یدابوونا زارۆیان زێده‌بووینه، ئه‌ڤه‌ژی بۆ زێده‌بوونا هژمارا ئاواره‌یان ل سنورێ دهۆكێ ڤه‌دگه‌ریته‌ڤه و گۆت: پلانا ژلایێ رێڤه‌به‌ریا گشتی یا ساخله‌میا پارێزگه‌ها دهۆكێ تا راده‌یه‌كێ مه‌زن شیایه كونترۆلا نه‌خۆشان و ده‌زگه‌هێن ساخله‌میێ بكه‌ت و هه‌ر نه‌خۆشه‌كێ سه‌ره‌دانا ده‌زگه‌هێن ساخله‌میێ كری یا پێدڤی یا بو هاتیه كرن.
