د. عامر سەباح حەسەن:فەرە پشکا سینەمایێ ل زانکۆیا دهۆک بهێتە ڤەکرن
ئەڤرۆ نیوز ، زنار تۆڤی:
د. عامر سەباح حەسەن نوری سەرۆکێ پشکا شانۆ و سینەمایێ ل کۆلیژا هونەرێن جوان ل زانکۆیا بابل ل عیراقێ بۆ ئەڤرۆ نیوز دیار کر: نوکە جۆداهیەکا مەزن د پرۆگرامێن خواندنا قۆتابیان دا ل عیراقێ هەیە، نوکە پرۆگرامێن خواندنێ ل زانکۆیێن بەغدا و بابل وەکو ئێک نینە، ئەڤە ژی ئاریشەکا مەزنە بۆ وان، لەوما دڤێت ئێدی پرۆگرامێن خواندنێ بهێنە نووکرن و وەکو ئێک لێ بهێن، داکو ئەم ژی بشێین ل گەل زانستا سەردەمانە برێڤە بچین، کادرەکێ باش یێ سینەمایێ بەرهەم بینین، دیسان پرانیا زانکۆیێن مە گرنگیێ ب وارێن زانستی ددەن، لێ دڤێت گرنگی ب ڤان پشکان بهێتە دان، چونکی مە پێدڤیەکا باش ب سینەمایێ هەیە.
ناڤهاتی گۆت ژی: د وارێ کادرێ سینەمایێ ل عیراقێ، مه گه‌له‌ك کێماسی هەنە، چونکی مامۆستایێن زانکۆیێ گرنگیێ ب مژارێن رەخنێ و سینەمایێ نادەن، گەلەک مامۆستایێن دەرهێنەر ل زانکۆیا کار دکەن، لێ چ فلم چێنەکرینە، لەوما ئەڤە نەشێت چ پێشکێشی قوتابیا و سینەمایێ بکەت، هەروەسا ب تنێ کارێ گەلەک ژ وان ب تنێ وانە گۆتنە و هزر و بیرێن وان ژی د کەڤنن و چ تشتێ نوو پێشکێشی قوتابیان ناکەن.
د عامری ئەو ژی دیار کر: 60% یا قوتابیان بۆ هندێ دخوینن داکو بهێنە دامەزراندن ل کەنالەکێ، لێ نەخودان شیانن، لەوما زانکۆیێن مە ئاریشە ل گەل قوتابیان هەنە، لەوما دەمێ دەردچن، نەشێن وەکو پێدڤی خزمەتا هونەڕی بکەن، دڤێت هندەک رێنما بهێنە دانان، ژ بۆ وەرگرتنا قوتابیان ل پشکێن سینەمایێ، هەتانوکە قوتابیێن مە نەشێن چ پێشکێش بکەن، دەمێ دەرچوونێ، دیسان نوکە کەسێن نە ئەکادیمی پتر د وارێ هونەری و سینەمایێ دا کار دکەن.
ئەو ژی گۆت: ل سالا 1909 ئێکەم فلم ل عیراقێ هاتیە نیشاندان، لێ سینەما عیراقی پێش نەکەفتیه، چونکی شەران هەموو تشت ل عیراقێ وێران کریە، هەروەسا فیسەڤالا دهۆکێ د ئاستەکێ بلند دایە و هۆلێن سینەمایێ یێن باش هەنە، لێ دڤێت پشکا سینەمایێ ل زانکۆیا دهۆکێ بهێتە ڤەکرن، هەروەسا دهۆک شیایە فیستەڤالەکا جوان رێکبێخیت و ڤێ چەندێ روویەکێ جوان ل دهۆکێ نیشاندایە.