د. ناسر هەركی: خوە ڤەكێشانا هێزێن ئەمەریكی ژ ئیراقێ د بەرژەوەندییا مە دا نینە
ئەندامەكێ بەرێ یێ لژنەیا ئاسایش و بەڕەڤانیێ ل جڤاتا نوونەرێن ئیراقێ ژ فراكسیۆنا پارتی دیموكراتی كوردستان، هوشداریێ ژ ڤوكێشانا هێزێن ئەمەریكی ژ ئیراقێ د دەت و ڕادگەهینیت، د ڤی قووناغی دا ڤەكێشانا وان هێزان د بەرژەوەندییا ئیراقێ دا نینە، ژ بەر كو ڕەوشا ئێمناهیێ هێشتا نەگەهشتییە ئاستێ ئارامیێ.
د. ناسر هەركی، ئەندامێ بەرێ یێ لژنەیا ئاسایش و بەڕەڤانیێ ل جڤاتا نوونەرێن ئیراقێ ژ فراكسیۆنا پارتی دیموكراتی كوردستان د داخۆیانییەكا ڕۆژنامەڤانیدا ئاماژە ب وێ چەندێ كر، حوكمەتا ئیراقێ د بجهئینانا بەرنامەیێن خوە یێن ئارامكرنا ڕەوشێ دا سەركەفتی نەبوویە. ناڤبری گۆت»شانێن نڤستی یێن داعشێ و گرۆپێن چەكدار یێن دەرڤەی دەستهەلاتا دەولەتێ كو خوەدی چەك و دارایی یێن مەزنن، مەترسییەكا ڕاستەقینەنە ل سەر ئیراقێ و هەرێما كوردستانێ».
سەبارەت ب ناڤمالا كوردی، د. ناسر هەركی دوپاتی ل وێ چەنێ كر كو تاكە ڕێ بۆ ڕووبڕووبوونا مەترسییان، ئێكگرتنا ناڤخوەیی یا كوردستانێ یە.
ناڤبری ئێگكرتنا هێزێن پێشمەرگەی ب پێنگاڤەكا گرنگ و ئەرێنی ل ڤی دەمی دا ناڤ كر و گۆت: «دڤێت ئەم بەرژەوەندیێن بلند یێن گەلێ خوە بێخینە سەر بەرژەوەندیێن حزبی، دا ب ئێكگرتنێ بشێین ڕووبڕووی پیلانێن نەیاڕێن كوردستانێ ببین».
