د ڤێ قووناغێ دا كوردان پێدڤی ب سەركەفتنا پارتی هەیە
سەرجان مەحموود
د ڕەوشەكی دا كو ڕۆژهەلاتێ ناڤین كەڤتیە قۆناغا گوهەرینە و سیستەم و ئاوایێ برێڤەبرنێ ژ نو ڤە دهێتە دزایكرن و نووژەنكرن، ئیراق دكەڤیتە قۆناخا هەلبژارتنان. هەلبژارتنێن ئیراقێ بۆ مە كوردان ژ ئیراقیان زێدەتر گرنگە. پەیوەندیێن سونە و شیعەیان ئالۆزن و ڕۆژ ب ڕۆژ ئالۆزیێن د ناڤبەرا وان دا ب دەستكاریێن توركیا و ئیرانێ بەر ب شەرێ ناڤخۆی ڤە دچیت. دیسا د ڤان چار-پێنج سالێن دەربازبووی دا فشارێن دەستهەلاتا ئیراقێ و شیەیان بۆ سەر هەرێما كوردستانێ ڤێ یەكێ سەلماند كو دڤێت كورد ب هێزەكی مەزن و ب هەستەكی نشتیمانپەروەری و ب خوەراگریێ بچیتە بەغدایێ.
دەستهەلاتدارێن باغدایێ هەتا نها ژی ب فەدەرالیزمێ باوەر ناكن و هەتا كو ژ دەستێ وان دهێت ب فشار و یاریێن جودا جودا دخوازن هەرێما كوردستانێ لاواز بكەن و قەوارەیا سیاسی یا هەرێما كوردستانێ بێ باندۆر بكەن یان ژ ناڤببەن. یاریێن باغدایێ یێن ل سەر مووچە و بودجەیێ، دوبارە دەستپێكرنا ئاكنجیكرنا ئەرەبێن هاوردە ل دەڤەرێن كوردستانی یێن دەرڤەیێ ئیدارەیا هەرێما كوردستانێ و ب درۆنێن ئێرش ئینانا سەر كێلگەهێن پەترۆلێ یێن كوردستانێ نیشانا شەرەكی دەروونیە بۆ سەر هەرێما كوردستانێ و گەلێ كورد.
د ڤان سالێن بۆری دا بەرسڤێن سەركردایەتیا پارتی ب سەرۆكاتیا سەرۆك بارزانی و برێڤەبرنا سیاسەتا كریاری ژ ئالیێ سەرۆك وەزیرێن هەرێما كوردستانێ ڤە وەسا كر كو بەغدا نەشێت پلان و پرۆژەیێن خوە ب سەر هەرێما كوردستانێ دا بسەپینیت. د قۆناغا دەربازبووی دا هەبوونا پدك ل ئیراقێ و سیاسەتا پارتی و هەولا پاراستنا دەستكەفتێن كوردستانێ هەتا ئاستەكی باش ڕێ ل بەر یاریێن دەستهەلاتدارێن ئیراقێ گرت، بۆ كو د قۆناغا بهێت هەموو مەترسیێن ل سەر هەرێما كوردستانێ بهێنە ژناڤبرن و دەستێ كوردان ل بەغدا بهێز ببیت پێدڤیە گەلێ كورد ب ڕێژەیەكا مەزن پشكداریێ د پرۆسەیا دەنگدانێ دا بكەن و ببن پشت بۆ پارتی داكو دەستكەفت بهێنە پاراستن و د شەڕێ سیاسی ئانكۆ دپلۆماسیێ دا دەستێ پارتی بهێزتر ببیت بۆ كو ڕۆلا خوە ب ڕەنگەكی سەركەفتی بۆ جیبەجێكرنا مادەیا 140 دا بگەرینیت.
مە د دەستپێكا نڤیسا خوە دا بەحسا ژ نووڤە دزایكرنا ڕۆژهەلاتا ناڤین و ئالۆزیێن د ناڤبەرا شیعە و سونەیان دا كر. ژبۆ كو ئەم بشێن ببەن پشكەك ژ هێزا دیاركەر و مافێن گەلێ خوە بپارێزن ژ هەر دەمێ زێدەتر مە پێدڤی ب هێز و شارەزای و خوەراگریا پارتی هەیە و بۆ ڤێ چەندێ ژی دەنگێ مە دێ بۆ لیستا 275 یا پارتی بیت. سەركەفتنا پارتی دێ دەستێ كوردان ل قۆناغا ئاشتیا ل باكورێ كوردستانێ و توركیا ژی بهێزتر بكەت و د هەمان دەمێ دا دێ ب هێز بۆ پاراستنا دەستكەفتێن ڕۆژاڤایێ كوردستانێ ژی.
