د یارییەكا دراماتیكی دا دادڤانێ یاریێ ئەنجامێ وەكهەڤی ب دووماهی ئینا
قەیس وەیس:
تیما فوتبۆلا یانەیا دهۆك دو خالێن گرنگن بەرانبەر مێڤانا خوە یانەیا مووسل ژ دەستدان پشتی ب سێ گۆلا وەكهەڤی بووی، د یارییا واندا ئەوا ژ چارچووڤەیێ گەڕا 35ێ ژ خولا ستێرێن ئیراقێ یا فوتبۆلێ ئەوا لیاریگەها یانەیا دهۆك هاتیە كرن.
گۆلا ئێكێ یا مووسل د خولەكا هەشتێ دا بوو ب لێدانا پەنەلیێ ژلایێ یاریزان ئیراهیم غازی ڤە، گۆلا وەكهەڤیێ یا دهۆكێ د خولا 46ێ دا بوو ژلایێ سەفا هادی، دووڤدا دهۆك ڤەگەڕیا گۆلا دویێ ب لێدانا پەنەلتیێ ژلایێ یاریزان پیتەر گۆرگیس د خولەكا 56ی دا، مووسل ڤەگەریا وەكهەڤیێ دخولەكا 72ێ ب لێدانا پەنەلتیێ ژلایێ جۆستین میرەندا، دادڤانێ یاریێ هەشت خولەك بلندكرن، پیتەر گۆرگیس شیا گۆلا سێیێ ب لێدانا پەنەلتیێ بۆ تیما خوە بینیت دخولەكا 90+5 دا، لێ گۆلا وەكهەڤیێ یا مووسل د خولەكا 90+10 هاتە تۆماركرن.
سەرۆكێ یانەیا دهۆك روهنكرنە دا
عەبدوللا جەلال گۆت: ئەو گۆتنا دادڤانێ یاریێ چو ڕاستی بوو نینە و ئەم دوورین ژ هەر گۆتنەكا دژی دادڤانان، ئەو دەمێ من دگەل دادڤانی ئاخڤتنی سەرپەرشتێ یاریێ و یێ دادڤانان و ڕێڤەبەرێ یاریێ ژی د ئامادەبوون بتنێ من گۆتێ هەوە غەدرە ل مە كر، راستە من ئاخڤتنەكا نە جوان گۆتبوو بڤی شێوەیی، تۆ یێ شەریف نینی، ئەڤە ژی د حالەتێ توورەبوونێ دا بووین و دادڤانان ئەگەرێن توندوتیژیێ بوون، پاشان من داخوازا لێبۆرینێ كر و سەرپەرشتێن یاریێ ب دلەكێ مەزن وەرگرت، من خواست بچمە لایێ دادڤانی و داخوازا لێبۆرینێ بكەم لێ ئەو ڕازی نەبوو.
هەروەسان ناڤهاتی گۆت: بۆ من جهێ حێبەتیێ یە گەهشتییە ڤێ قەبارێ مەزن و دەنگەك بهێتە بەلاڤكرن كو كەڤێن كۆشتنێ ل سەر هاتینە كرن، سەیرە نێزیكی 30 كەسان دەوروبەرێن مە بوو، بلا بهێت ب بەلگە ڤێ ئاخڤتنێ ب سەلمینیت، هێزێن ئێمناهیێ دگەل دا بوون هەتا ژ دهۆكێ دەركەڤتین، چو روودان و ئەوا ئاخڤنێن دبێژن راستی بوو نینە.
هەروەسان د. عەبدوللا گۆت: پشتی یاری ب دووماهی هاتی ئەو جەماوەرێ توورە ل پاركا یانەیێ دگەل ئاخڤتیمە و من داخواز ژ وان كرییە بهێنفرەهـبن و ب چنە مالێن خوە، هیچ شێوەیەكێ مە نە هێلایە كەس خوە نێزیكی دادڤانان بكەت پشتی چووینە د ژورا خوە ڤە و هەكە من كەڤ لێ كربن بلا بەلگەیێ بینیت و هەكە نەهینیت یاسا دێ دناڤبەرا مە دابیت، د ژیانا خوە دا هەمیێ من كەڤ نە كرینە، ئەو ئاریشەیا پەیدابوو هەر ئەو ئەگەر بوو.
رۆژنامەڤانەكێ وەرزشی دادڤان ب ئەگەرێ روودانا دازانین
ژلایەكێ دووڤە عومەر ڕیاز رۆژنامەڤانێ وەرزشی یێ دیار ل ئیراقێ گۆت: راستە شاشیێن دادڤانان پشكەكە ژ یاریێ لێ، بەردەوامییا شاشیێن دادڤان ئەحمەد كازم د یارییان دا و دووڤدا دەهـ یارییان د خولێ دا بهێتە سزادان و ل سەر شاشیێن خوە بەردەوامبن ڕامانا وێ یێ ژ هەژی نینە هیچ یارییەكێ بڕێڤە ببەت، هەلبەت نە یارییا ئێكێ یە ئەڤ دادڤانە بڤان شاشیان برێڤە دبەت، یا سەیر ئەوە ئەو دشیا یاریێ ب دووماهی بنیت پشتی بۆرینا سێ خولەكێن سەر زێدەكری دا ئانكو هەتا ژ وەختێ زێدەكری ژی بووری بوو، لێ یاری هێلا هەتا گۆلا وەكهەڤیێ هاتی و بوو ئەگەر توندوتیژی پەیدابیت.
