روسیا ھەموو وەلاتێن ناتۆ ب دۆژمنێ خوە یێ سەرەکی دزانیت
ئەڤرۆ:
ڤیلادەمیر پۆتین سەرۆک کۆمارێ روسیا د داخۆیانیەکێ ل باژارێ موسکو سەبارەت ب بەرنامی سەربازی یێ روسیا داخۆیانیێن گرنگ دان و دیار کر کو ئوکرانیا یێ بزاڤێ دکەت کو ببیتە ئەندامێ ناتۆ و ئەڤە ژی پیلانەکا مەزنە کو دەمەک درێژە وەلاتێن رۆژئاڤا کاری بۆ دکەن و دخوازن ب ڤی رەنگی بنگەھێن خوە یێن سەربازی ل سەر سنۆرێ مە دروست بکەن و دەستێوەردانێ د ناڤ کاروبارێ وەلاتێ مە بکەن و گۆت: (ئەڤە ب چو رەنگەکێ ناھێتە قەبوول کرن و نھا ناتۆ دۆژمنێ سەرەکی یێ روسیایە و ب سالانە ئەو کار بۆ لاوازیا روسیا دکەن و شەرێ چەند سال بەری یێ جۆرجیا ژی بۆ ڤێ یەکێ ھاتیە کرن کو پێگەھێ وەلاتێ مە لاواز بکەن، لێ نەشیان سەربکەڤن و ڤێجارێ ژی ئەم ناھێلین کو ئەو بگەھنە مەرەمێن خوە).
سەرۆکێ روسیا ئەو یەک ژی دیار کر کو ئەمریکا و وەلاتێن رۆژئاڤا داعشێ بۆ مەرەمێن خوە بکار دھینن و دخوازن داعشێ نێزیکی سنۆرێ روسیا ژی بکەن و گەلەک بەلگە د دەستێ مە دا ھەنە و ھەروەسا وەلاتێن ئەندامێن ناتۆ ب ھزاران سیخورێن خوە رەوانەی ناڤ ئاخا وەلاتێ مە کرینە، لێ ئەڤ پیلانێن وان سەرکەڤتی نابن و ئەڤرۆکە روسیا وەلاتەک ب ھێزە و بێی روسیا چو بەرنامەک ل دەڤەرێ سەرکەڤتی نابیت و گۆت: (ناتۆ دۆژمنێ سەرەکی یێ روسیایە و مە د ستراتیژیا خوە یا نوو یا سەربازی دا ئەو یەک دەستنیشان کریە و بەرنامێ روسیا ل سەر وی بنەمایی ھاتیە دارێتن).
چاڤدێرێن سیاسی دیار دکەن کو ئوکرانیا دێ ھەر بیتە ئەندامەکێ ناتۆ، چونکو ئەمریکا و وەلاتێن رۆژئاڤا دزانن کو پێگەھێ جوغرافی یێ ئوکرانیا گەلەک بۆ وان گرنگە و ئەو دشێن ب رێیا ئوکرانیا گەلەک ئاستەنگیان بۆ روسیا دروست بکەن و وی وەلاتی لاواز بکەن، روسیا ژی ھەر زوو ھەست ب وێ مەترسیێ کر و ژ بەر ھندێ ژی ھەر زوو قرم ژ ئوکرانیا جودا کر و نھا کار بۆ جوداکرنا ھەرێما رۆژھەلاتێ ئوکرانیا ژی دکەت، واتە شەرەکی مەزن د ناڤبەرا روسیا و وەلاتێن ناتۆ دا ھەیە و رەنگە ئەو شەر ل گەل ئالۆزیێن نھا ل رۆژھەلاتا ناڤین ببنە دەستپێکا شەرەکی نوو یێ جیھانی.
