رۆژانە ٢٢ هزار كارتۆنێن هێكان ل هەرێما كوردستانێ دهێنە بەرهەمئینان
هەولێر، قائید میرۆ:
بەرپرسەكێ وەزارەتا چاندنێ دیار كر، هەرێما كوردستانێ د بەرهەمئینانا هێك و مریشكان دا گەهشتیە ئاستەكێ بلند و گەلەك زێدەتر ژ پێدڤیێن بازاڕێ ناڤخۆیی بەرهەم هەیە و دبێژیت: رۆژانە 22 هزار كارتۆنێن هێكان ل پڕۆژەیێن ناڤخۆیی دهێنە بەرهەمئینان و رێژەیەكا زۆر ژێ دچیتە پارێزگەهێن دی یێن ئیراقێ.
فیراس سەدیق، رێڤەبەرێ سامانێن ئاژەلی ل وەزارەتا چاندنێ بۆ رۆژناما ئەڤرۆ ئاشكراكر، بەرهەمێ هێك و مریشكێن هەرێما كوردستانێ گەهشتیە ئاستەكێ بلند و د دەمێ نوكە دا رێژەیا بەرهەمی گەلەك ژ خواستا بازاڕێ ناڤخۆیی پترە، لەوڕا ژی بەرهەمێ هەرێمێ دچیتە پارێزگەهێن دی یێن ئیراقێ و گۆت: «مخابن، گەلەك جاران رێگری ل چوونا بەرهەمێ هێك و مریشكان دهێتە كرن و ئاستەنگ بۆ هنارتنا وان ژلایێ ئیراقێ ڤە هەنە، چاوا ئاستەنگ بۆ پرسێن دی دهێنە چێكرن وەسا ژی بۆ بەرهەمێ هێك و مریشكان ژی دهێنە چێكرن».
فیراس سەدیق گۆت ژی: «بەری حەفت سالان رۆژانە ب تنێ دو هزار كارتۆنێن هێكان ل هەرێمێ دهاتنە بەرهەمئینان، بەلێ نوكە رۆژانە پڕۆژەیێن هەرێما كوردستانێ شیانێن بەرهەمئینانا 22 هزار كارتۆنێن هێكان هەنە د رۆژەكێ دا، پێدڤیا بازاڕێ ناڤخۆیی ب تنێ رۆژانە حەفت هزار كارتوونن، ئانكو 15 هزار كارتۆن ژ پێدڤیێن ناڤخۆ زێدەنە، بەرهەمێ هێكێن هەرێما كوردستانێ ژلایێ ساخلەمی ڤە گەلەك ژ هێكێن دەرڤە باشترن و ب كوالێتیەكا زۆر باش دهێنە بەرهەمئینان، ژلایێ وەلاتیێن ئیراقێ ژی ڤە خواستەكا زۆر لسەر بەرهەمێ هێك و مریشكێن هەرێمێ هەیە».
