رۆژانە پتر ژ 130 هـزار هێك ل دهۆكـێ دهێنە بەرهەمئینان
دهۆك، دلۆڤان ئاكرەیی:
ڕێڤەبەرێ سامانێ ئاژەلی ل دهۆكێ دیاركر، ل دهۆكێ بەرهەمئینانا هێكان گاڤێن مەزن هاڤێتینە و رۆژانە ب ڕێیا پێنج پڕۆژەیێن جودا پێدڤیێن بازارێن هەرێما كوردستانێ و ئیراقێ دهێنە دابینكرن.
ڕێدیر سدقی، ڕێڤەبەرێ سامانێ ئاژەلی ل دهۆكێ بۆ رۆژنامەیا ئەڤرۆ گۆت: «ل پارێزگەها دهۆكێ پێنج پڕۆژەیێن مەزن یێن بەرهەمئینانا هێكێن ناڤخۆیی هەنە، رۆژانە پتر ژ 130 هزار هێكێن نوی بەرهەم دئینن، ئەڤ بەرهەمە زێدەباری كو بۆ بازارێن ناڤخۆیی دهێنە هنارتن، پشكەكا وان بۆ باژارێن دی یێن ئیراقێ ژی دهێنە هنارتن».
گۆت ژی: «پێدڤیا رۆژانە یا پارێزگەها دهۆكێ نێزیكی هزار و 500 بۆ هزار و 600 كارتۆنانە، د نوكە دا ئاستێ بەرهەمئینانێ د ناڤبەرا هزار و 500 بۆ دو هزار كارتۆنان دایە، ئەم پێشبینی دكەین د پاشەڕۆژەكا نێزیك دا ئاستێ بەرهەمئینانێ بۆ چار هزار كارتۆنان د رۆژەكێ دا بلند ببیت».
