رۆژا جیهانی یا ئافرەتان ب چەندین چالاکیان دێ ل هەرێمێ هێتە ساخکرن
ئەڤرۆ نیوز، رێوار مزیری:
ئەندامەکا مەکتەبا سکرتاریەتا ئێکەتیا ئافرەتێن کوردستانێ بۆ ئەڤرۆ نیوز دیار کر کو رۆژا جیهانیا ئافرەتان کو دکەڤیتە رۆژا 8/3/2019 دێ ل ژێر درووشمێ (هەڤسەنگی ژ پێخەمەت ژیانەکا باشتر) ب چەندین چالاکیان ل سەرانسەری هەرێما کوردستانێ هێتە ساخکرن.
شەیما مستەفا، ئەنداما مەکتەبا سکرتاریەتا ئێکەتیا ئافرەتێن کوردستانێ پشتی ب هەلکەفتا رۆژا جیهانی یا ئافرەتان پیرۆزباهی ل هەموو ئافرەتێن جیهانێ و ب تایبەت یێن کوردستانێ کری ئاشکرا کر کو د رۆژا جیهانیا ئافرەتان دا دێ چەندین چالاکیێن جوراوجور ل سەرانسەری هەرێما کوردستانێ هێنە ئەنجامدان ژوان ب ڤێ هەلکەفتێ دێ بەیاننامەک ب هەر سێ زمانێن (کوردی، عەرەبی، ئینگلیزی) هێتە دەرکرن، هەروەسا ل رۆژا 6/3/2019 دێ پرۆژە قانوونا (ماف و ئەرکێن هەڤژینان) پێشکێشی پەرلەمانێ کوردستانێ هێتەکرن و گۆت: “ب هەمان هەلکەفت دێ هێلێن ڤەگوهاستنێ ب پاسان ل باژێرێن (دهۆک و هەولێرێ) ل رۆژە 8 ێ ڤێ هەیڤێ بۆ ئافرەتان بێ بەرامبەر بن و سەرەرایی ڤێ چەندێ دێ چەندین پۆستەرێن تایبەت ب ڤێ رۆژێ ڤە ب پاسان ڤە هێنە هەلاویستن”.
ناڤهاتیێ ئاماژە دا وێ چەندێ کو ب هەمان هەلکەفت ل رۆژا 8 ێ ڤێ هەیڤێ دێ سەرەدانا مەزارێ نەمران ل بارزان هێتەکرن و د هەمان رۆژ دا تۆرا رێکخراوێن ئێکەتیا ئافرەتێن کوردستانێ دێ داخوازەکێ ژ وەزارەتا ئەوقاف و کاروبارێن ئایینی یا حوکمەتا هەرێما کوردستانێ کەت رۆژا 8ی ڤێ هەیڤێ کو دکەڤیتە د رۆژا ئەیینی دا گۆتارا رۆژا ئەینی ل هەموو مینبەران یا تایبەت بیت ب یەکسانی و حەز ژێکرن و لێبوورنێ ڤە د ناڤ خێزانێ دا و گۆت: “ل رۆژا 7 ی ڤێ هەیڤێ ب مەرەما ئیدانەکرنا وان کارێن نەمرۆڤانە یێن بەرامبەر ئافرەتێن ئێزدی ژلایێ تیرۆرستێن داعش ڤە ل باغوز دهێنەکرن ل سەر پێشنیارا ئێکەتیا ئافرەتێن کوردستانێ و تۆرا رێکخراوێن ئێکەتیا ئافرەتێن کوردستانێ دێ چینە بەرامبەر بارەگایێ نەتەوێن ئێکگرتی بۆ خواندنا بەیاننامەکێ و نیشادانا هەلویستێ رێکخراوان ل سەر وان کارێن درندە”.
ل دووماهیێ شەیمایێ دیار کر کو د رۆژا جیهانی یا ئافرەتان دا دێ سپۆتەک تەلەڤزیونی ب پشکداریا کەسێن بسپۆر د بوارێن جودا دا بۆ دەرخستنا پەیامێن جودا ل سەر رۆل و گرنگیا ئافرەتێ د جڤاکی دا هێتە نیشادان، هەروەسا دێ چەندین پەیامێن تایبەت ب ڤێ رۆژێ ڤە د تۆرێن جڤاکی دا هێنە بەلاڤکرن و سەرەرایی ڤێ چەندێ دێ چەندین بەرنامێن تایبەت ب هەمان رۆژ ڤە ل رادیۆیا (هێلین) یا ئێکەتیا ئافرەتێن کوردستانێ هێنە پێشکێشکرن.
