رۆژناما تایمز: پۆتین دێ ب رێیا غازێ شەرێ ئورۆپا کەت
رۆژناما تایمز یا بریتانی د راپۆرتەکێ دا دیار دکەت کو پشتی وەلاتێن ئورۆپا سەبارەت ب پرسا ئوکرانیا دژبەریا روسیا کرن و سزایێن ئابووری ل سەر روسیا ھاتنە سەپاندن نھا پۆتین دخوازیت پەیوەندیێن وەلاتێ خوە ل گەل چین، ئیران و تورکیا گەلەک باش بکەت و ئێکەتیەکا ب ھێز یا ئابووری ل دژی رۆژئاڤا دروست بکەت و ژ بەر ڤێ یەکێ ژی پۆتین سەرەدانا تورکیا کر و د پرێس کۆنفرانسەکی دا ب رەنگەکێ ئاشکرا دیار کر کو تورکیا و روسیا دێ د بیاڤێ ئابووری دا پتر ژ ھەر دەمەکێ پەیوەندیێن خوە ب ھێز بکەن.
د بەردەوامیا راپۆرتێ دا ھاتیە کو پۆتین دخوازیت ب رێیا غازێ شەرێ ئورۆپا بکەت و نھا پێدڤیا وەلاتێن ئورۆپا ب غازێ رۆژێ ب رۆژێ زێدە دبیت و روسیا وەک ئێک ژ وەلاتێن کو غازێ رەوانەی ئورۆپا دکەت دێ ڤێجارێ غازێ وەک کارتەکا شەری ل دژی ئورۆپا بکار بینیت.
د دووماھیا راپۆرتێ دا ئاماژە ب ڤێ یەکێ ھاتیە کرن کو ھەتا نھا وەلاتێن ئورۆپا نەشیاینە بەدیلەکێ دی ل ھەمبەر غازا روسیا پەیدا بکەن و ھەکە روسیا ل وەرزێ زڤستانێ ئاستێ ھنارتنا غازێ بۆ ئورۆپا کێم کەت یان ژی بدەتە راگرتن دێ کاریگەریەکا گەلەک خراب ل ئورۆپا کەت و رەنگە گەلەک وەلاتێن ئورۆپا نەچار بن کو سزایێن ئابووری یێن کو ل سەر روسیا ھاتینە سەپاندن، ھلوەشینن و نھا پۆتین ئەو راستی دایە بەرچاڤ و ب رەنگەکێ باش بزاڤێ دکەت ب رێیا شەرێ غازێ سزایێن کو ئورۆپا ل سەر روسیا سەپاندینە بدەتە راکرن.
