رۆژنامه‌كا ئه‌مریكی به‌حسێ خوه‌ڤه‌كێشانا داعش دكه‌ت
ئه‌ڤرۆنیۆز، ئه‌یاد به‌روارى
رۆژنامه‌كا ئه‌مریكی د راپۆرته‌كا خوه‌دا به‌لاڤكریه كو رێكخستیا داعش یا تیرۆرستی ژ ئه‌نجامێ پێشداچوونێن ڤێ دووماهیێ ده‌ست ب ڤه‌گوهاستنا بنگه‌هێن هێزا خوه كریه ژ سووریێ و عیراقێ به‌ر ب باكوورێ ئه‌فریقیا.
رۆژناما (ئه‌نترناشیۆنال بێزنس تایمز) یا ئه‌مریكی د راپۆرتا خوه‌دا ژ ئه‌ندامه‌كێ گرۆپه‌كا شه‌ڕێ داعشێ ل سووریێ دكه‌ت ڤه‌گوهاستیه كو داعش یا خوه ژ مه‌یدانێن روو ب رووبونێ ڤه‌دكێشیت به‌ر ب لیبیا.
رۆژناما ئه‌مریكی دبێژیت” پشتی ده‌ستپێكرنا هێرشێن ئه‌سمانی یێن روسی و هێرشێن وه‌لاتێن هه‌ڤپه‌یمان ژی، داعش یا نه‌چاربووی ئاخا سووریێ بجه بهێلیت و بزاڤێ دكه‌ت بنگه‌هه‌كێ دی بۆ خوه ل لیبیا دروست بكه‌ت”.
ل دووڤ رۆژناما ناڤبری” ب ڤه‌گوهاستنا بنگه‌هێ خوه بۆ لیبیا، داعش دێ مفای ژ وێ ئاژاوه‌گیریا ل لیبیا هه‌ی بینیت، ژ به‌ر كو چه‌ك و به‌نده‌رێن ده‌ریایی یێن لیبیا هه‌ین كو دێ بنه ئه‌گه‌ر بۆ به‌رفره‌هبوونا كریارێن وێ رێكخستیا تیرۆرستی و دووریا لیبیا ژ مه‌یدانا شه‌ڕی ل عیراقێ و سووریێ”.
ڤێ رۆژناما ئه‌مریكی ژ شرۆڤه‌كارێ تایبه‌تمه‌ند د به‌رهنگاریا تیرۆرێ دا ل بنگه‌هێ ڤه‌كۆلینێن شه‌ڕی (هارلین كامبهیر) ڤه‌گوهاستیه كو تیرۆرستێن داعشێ ب تایبه‌تی ژی یێن تونسی یێ سووریێ بجه دهێلن و ب ڕێیا توركیا یێن به‌ر ب ده‌ڤه‌را (سینا) ل مسرێ دچن كو بنگه‌هه‌كێ هێزا داعشێ ل وێرێ یه و ژ سینا ب ساناهی دچنه لیبیا.
