رێكا گه‌لیێ زاویته چه‌وا هاتیه چێكرن؟
ئه‌ڤرۆ ، سالار محه‌مه‌د دۆسكی:
سه‌رپه‌رشتێ ڤه‌كرنا رێكا گه‌لیێ زاویته ل سالا 1979 به‌حسێ ڤه‌كرنا وێ رێكێ دكه‌ت و ئه‌و ئاسته‌نگێن د وی ده‌می دا دروست بووین و دیسا بۆچی پلانا ڤه‌كرنا رێكێ هاته گوهۆۆرین و پشتی ئه‌نجامدانا ڤی كاری چه‌وا بوو جهه‌كێ گه‌شت و گوزاری و دبێژیت: ئه‌و رێك نوكه بوویه جهه‌كێ گه‌شت و گوزاری و رێكا كه‌ڤن مه بجهێلا وه‌ك رێكه‌كا گه‌شت و گوزاری و دهێته بیرا من ده‌مێ مه كار ل بنێ گه‌لی دكر خه‌لك مه‌نده‌هوش دبوو.
شێخ مه‌ئمون بریفكانی، رێڤه‌به‌رێ به‌رێ یێ رێك و پران ل دهۆكێ و سه‌رپه‌رشتێ دروستكرن و ڤه‌كرنا رێكا گه‌لیێ زاویته د دیداره‌كا رۆژنامه‌ڤانی دا به‌حسێ دروستكرنا رێكا گه‌لیێ زاویته دكه‌ت ل به‌ری سه‌رهلدانێ و بۆ رۆژناما ئه‌ڤرۆ گۆت: ل سالا 1978 و 1979، رێڤه‌به‌ریا رێك و پرا ده‌ست ب به‌رفره‌هكرنا رێكا گه‌لیێ زاویته كر، د چارچووڤێ پرۆژێ رێكا دهۆك ئامێدیێ دا وی ده‌می رێڤه‌به‌رێ رێك و پرا ئه‌ندازیار (عادل سه‌دیق) بوو، خه‌لكێ كه‌ركووكێ و توركمان بوو، ل وی ده‌می ئه‌ز نه سه‌رپه‌رشتیارێ ڤی كاری بووم، به‌لكو من ل هنده‌ك پرۆژێن دی كار دكر، ده‌مێ جاره‌كێ ژ سه‌ر كاری ڤه‌دگه‌ریام من رێكا گه‌لیێ زاویته دیت، ده‌مێ ب رێكه‌كا زانستی نه كار دهاته‌كرن، له‌وما ژی به‌ره‌ف رێڤه‌به‌رێ مه عادل سه‌دیق چووم و من ئاگه‌هداركر كو شێوازێ كاركرنا رێكا گه‌لیێ زاویته ب شێوه‌كێ هه‌ره‌مه‌كی دهێته دروستكرن و نه ب شێوه‌كێ زانستی و خرابی یا وێ زێده‌تره ژ مفایێ وێ.
شێخ مه‌ئمون بریفكانی زێده‌تر ژی گۆت: من گۆته رێڤه‌به‌رێ رێك و پرا دێ رۆژێن بهێت ڤی كاری گه‌له‌ك زیانێن خوه هه‌بن و دێ دیاربن وه‌ك، كار دێ هێته‌كرن ب ته‌قاندنا گه‌لی و كه‌ڤرا و چیا و ب ره‌نگه‌كێ ستوونی و ب ڤی ره‌نگی دێ كارێن ته‌قاندنا مه‌زن تێدا هێنه ئه‌نجامدان، ئه‌ڤ چه‌نده دێ سرۆشتێ چیای ژ هه‌ردو لایان ڤه هێته گوهۆرین و دێ دیمه‌نێن جوان تێكده‌ت و گوهۆریت.
هه‌روه‌سا ژ به‌ر په‌قاندنێ دێ گه‌له‌ك داروبار هێته ژناڤبرن و تایبه‌ت كاژ و گه‌له‌ك تێلێن راكێشانا كاره‌بێ ل ده‌ڤه‌رێ هه‌بوون و ب ته‌قاندنێ هه‌ر هه‌موو دهێنه ژنافبرن و دێ گه‌لی تژی ئاخ و به‌ر بیت و دێ بیته ئه‌گه‌ر زیانه‌كا مه‌زن بۆ ژینگه‌هێ و سرۆشتی چێبیت و دێ ئاڤ په‌نگیت د گه‌لی دا و گه‌له‌ك ئه‌رد ل سه‌ر گه‌لی دێ بن ئاڤ بیت و ب ئه‌گه‌رێ ته‌قاندنێ بۆ ماوه‌كی رێكا هاتن و چوونێ دهێته گرتن و ئه‌ڤه ژی دێ بیته نه‌خوشیه‌ك بۆ وه‌لاتیان و هاتن و چوونێ.
ناڤبری ئاشكرا ژی كر كو پشتی ڤێ روونكرنێ رێڤه‌به‌رێ رێك و پرا ئه‌ندازیار عادل سه‌دیق گۆت: پشتی بۆچوونا من وه‌رگرتی من گۆتێ گه‌له‌ك رێك هه‌نه و مه پێدڤی ب ڤێ چه‌ندێ هه‌موویێ نینه، چونكه دێ زیانێن ڤێ رێكێ گه‌له‌ك بن و ئه‌م دشێین رێكا گه‌لی ڤه‌كه‌ین و رێكا كه‌ڤن بۆ هاتن و چوونا ترۆمبێلان بهێلین و ل بن گه‌لی كار بكه‌ین، ئینا رێڤه‌به‌رێ رێك و پرا گۆت: گه‌له‌ك كه‌ڤر و ئاڤ د گه‌لی دا هه‌یه و گه‌له‌كا ب زحمه‌ته كار تێدا بكه‌ین، من گۆتێ ئه‌و ب ساناهیتره ژ ڤی كارێ نوكه هین د گه‌لی دا دكه‌ن، باوه‌ری بۆ دروست بوو و رازیبوو پرۆژه راده‌ستی من كر و مه ده‌ست ب پاقژكرنا گه‌لی كر و مه هه‌می ئاسته‌نگ نه‌هێلان و مه ده‌ست ب دروستكرنا دیواره‌كێ پالپشت كر دا كو رێكا ئاڤا ڤه‌گوهێزین و جودا بكه‌ین ژ رێكا پێشنیاركری و دو قه‌نته‌رێن كونكریتی مه دروستكرن دا كو ئاڤا تێدا بچیت و پشتی وێ چه‌ندێ مه جهێ ده‌ڤه‌را تژی ئاخكر و دروستكرنا رێكێ ب ته‌مامی هاته بجهئینان.
شێخ مه‌ئمون بریفكانی ئه‌و ژی گۆت: ئه‌و رێك نوكه بوویه جهه‌كێ گه‌شت و گوزاری و رێكا كه‌ڤن مه بجهێلا وه‌ك رێكه‌كا گه‌شت و گوزاری و دهێته بیرا من ده‌مێ مه كار ل بنێ گه‌لی دكر خه‌لك مه‌نده‌هوش دبوو، كا دێ چه‌وا رێك دڤێرا چیت و مه دگۆتێ بێهنا خوه فره‌ه بكه‌ن هه‌تا ته‌مام دبیت، دێ بیته رێكه‌كا گه‌له‌ك خوش، ل وی ده‌می ل گه‌ل ئه‌ندازیار یونس عه‌بدولعه‌زیز مه كار د پلانا ڤه‌كرنا رێكێ دانا ژ دانانا ساید و ئاسنێن پاراستنێ ل سه‌ر رێكێ دانان وی ده‌می ڤه‌كرنا رێكان ب tnt بوو نوكه ب رێكا ئامیران ئه‌ڤ كاره دهێته‌كرن، دیسا ئه‌ندازیار نوری سه‌عدون ژی هاریكاربوو ل گه‌ل من د دروستكرنا ڤێ رێكێ دا.
