رێكخراوا بەدر: بكارهینانا هێزێ بۆ ژچەككرنا گرۆپان دێ بیتە ئەگەرێ شەڕێ ناڤخۆ
رێكخراوا بەدر ب سەرۆكایەتییا هادی عامری هۆشداریێ ددەتە حوكمەتا ئیراقێ ژ هەر بزاڤەكا بۆ بكارهینانا هێزێ ب مەرەما ژ چەككرنا گرۆپێن چەكدار و راگەهاند، ئەڤ پێنگاڤە دێ بیتە ئەگەرێ شەڕێ ناڤخۆ.
محەمەد ناجی، بەرپرسێ مەكتەبا سیاسی یا رێكخراوا بەدر، د بەیاننامەیەكێ دا كو ل تۆڕا جڤاكییا (ئێكس) بەلاڤكرییە، نڤیسییە»پەنابرن بەر هێزێ دژی گرۆپێن چەكدار دێ بیتە ئەگەرێ شەڕێ ناڤخۆ و تنێ د بەرژەوەندییا ئەمریكا و ئیسرائیلێ دایە».
محەمەد ناجی، رەخنە ل عەلی فالح زەیدی، سەرۆك وەزیرێن ئیراقێ گرتن و نڤیسی «عەلی زەیدی ل بن گڤاشتنێن واشنتۆنێ لەز كریە و دڤێت بەرامبەر ڤەكێشانا هێزێن بیانی، چەكێ (بەرەیێ موقاوەمێ) كۆنترۆل بكەت».
بەرپرسێ رێكخراوا بەدر سێ پێشنیاز وەك مەرج بۆ كۆنترۆلكرنا چەكێ گرۆپان ئێخستینە بەر دەست: ڤەكێشانا تەمام یا هێزێن ئەمریكی، نەهێلانا مەترسیێن ستراتیژی ل سەر ئیراقێ، و ئاڤاكرنا تەمام یا هێزێن چەكدار ب تایبەت د بوارێ بەرگرییا ئەسمانی دا.
ئەڤ گرژییە د دەمەكێ دایە كو ئالیێن سیاسی رۆژا 30ی ئیلۆنێ وەك دووماهی ژڤان بۆ كۆنترۆلكرنا چەكی ل دەستێ دەولەتێ دیار كرینە، ئەڤ چەندە هێزێن ئەمنی ئێخستینە حالەتێ ئامادەباشییێ بۆ رووبڕووبوونا هەر ئەگەرەكێ نەچاڤەڕێكری.
ژ ئالییەكێ دی ڤە، كەنالێ (رووسیا ئەلیەوم) ژ زاردەڤێ حوسێن عەلی موسەوی، پەیڤدارێ بزاڤا (نوجەبا) یا ئیراقی ڤەگوهاست» پرسا سنۆرداركرنا چەكی د دەستێ دەولەتێ دا، تنێ چەكێ (بەرەیێ موقاوەمێ) دكەتە ئارمانج و ئەڤە ب فەرمان و داخوازا ئەمریكا و ئیسرائیلێ یە».
پەیڤدارێ بزاڤا (نوجەبا) یا ئیراقی هەروەسا دوپاتی ل وێ چەندێ كر كو بزاڤا وان ب چو رەنگەكێ چەكێ خۆ رادەست ناكەت.
ناڤبری گۆت ژی»پرسا دەستبەسەرداگرتنا فرۆكەیێن بێ فرۆكەڤان كو ژ ئالیێ لایەنێن فەرمی ڤە هاتییە راگەهاندن، شانۆگەرییەكا دروستكرییە و چو راستییەك د وێ دا نینە».
موسەوی دوپاتی ل وێ چەندێ ژی كر كو»نێزیكی 15 هزار چەكدارێن پارتییا كاركەرێن كوردستانێ (پەكەكە) ل شنگالێ هەنە كو خودانێن چەكێن ناڤنجی و گرانن».
پەیڤدارێ بزاڤا نوجەبا ئەڤە ژی گۆت «رێككەفتننامەیێن ئابۆری یێن د ناڤبەرا بەغدایێ و واشنتۆنێ دا، ئیراق ژ قووناغا داگیركارییا سەربازی ڤەگوهاستییە بۆ قووناغا داگیركارییا ئابۆری».
