رێكه‌فتنا ئیرانێ دێ ڤێ زیانێ گه‌هینیته كوردان
ئه‌ڤرۆنیۆز، سالار دۆسكى
پشتى سێزده سالان ژ دانوستاندنان، وه‌لاتێن 5+ 1 گه‌هشتنه رێكه‌فتنێ ل گه‌ل ئیرانێ، سه‌ر هندێ كو ئیران چه‌كێ ناڤوكى دروست نه‌كه‌ت، مامۆستایێ زانكۆیێ ژى دیار دكه‌ت كو رێكه‌فتنێ دێ باندورا خوه ل سه‌ر كوردان هه‌بیت.
د.هه‌وار نێروه‌یى مامۆستایێ زانكۆیا دهۆكێ بۆ ئه‌ڤرۆ نیۆز دیاركر پشتى ئه‌ڤێ رێكه‌فتنێ ده‌رگه‌هێ ئابوورى و سیاسى یێ ئیرانێ ل سه‌ر ئاستێ هه‌رێمێ و نیڤده‌وله‌تى دێ ڤه‌كه‌ت، به‌لێ دێ بن چاڤدیریا نه‌ته‌وێن ئێكگرتى بیت و ئه‌ڤه پتر دبه‌رژوه‌ندیا ئیران و وه‌لاتێن زلهێزدایه.
د.هه‌وارى هێشتا گۆت: رێكه‌فتنێ باندوره‌كا ئه‌رێنى و نه‌رێنى ل سه‌ر هه‌رێمێ هه‌یه، ئالگورى یا ئابورى دناڤبه‌را سنوران دا دێ گه‌رمتر لێ هێت، داهاتێ هه‌رێمێ ب رێكا هه‌رسێ ده‌رگه‌هێن (حاجى عومران، باشماغ، په‌رواز خان) دێ زێده‌بیت، دیسان باندورا خراب په‌ترۆله‌كا پتر دێ كه‌ڤیته بازارى و بهایێ په‌ترۆلێ به‌رزنابیت، دڤێت حوكمه‌تا هه‌رێمێ گرنگیێ ب بیاڤێن كشتوكالى و پیشه‌سازى بده‌ت، دیسان توركیا ب شێوه‌كێ سیستماتیك تێكه‌لیێن ئابوورى ب تایبه‌ت په‌ترۆلێ ل گه‌ل ئیرانێ دروست كه‌ت، ئه‌ڤه ژى دێ باندور هه‌بیت ل سه‌ر په‌یوه‌ندیێن هه‌رێم و توركیا دا.
هه‌مبه‌ر لایه‌نێ سیاسى و كارتێكرنا رێكه‌فتنێ، د.هه‌وار گۆت: باندور هه‌یه ل سه‌ر هاوكێشا سیاسى ل رۆژهه‌لاتا ناڤین، رێكه‌فتن پتر دبه‌رژوه‌ندیا به‌ره‌یێ شیعه دایه و دێ بهێزتر كه‌ت، له‌وما ئسرائیلێ و ده‌وله‌تێن عه‌ربى سونه نشین ب توندى هه‌لویستێ خوه هه‌مبه‌ر رێكه‌فتنێ دیاركریه.
