رێژا دەوامنه‌کرنا قوتابیان بگەھتە ١٨٠ رۆژان، دانپێدان ب باوەرنامێن وان ناھێتە کرن
ئەڤرۆ، سالار دۆسکی:
سەرۆکا لیژنا پەروەردێ ل جڤاتا پارێزگەھا دھۆکێ دیارکر کو ھەتا نوکە رێژا دامەزراندنێ و میلاکاتا ل پارێزگەھا دھۆکێ ب شێوێ قانوونی وەک ماف نەھاتیە دابینکرن، بۆ ڤالاکرنا قوتابخانا ژ ئاواران چەندین پێنگاڤێن گرنگ و بلەز ھاتیە ھاڤێتن و گۆت: ١٨٠ رۆژان قوتابی دەوامێ نەکەن باوەرنامە نە یا دانپَیدانکری.
جمبد شوکری ئاکرەیی بۆ ئەڤرۆ گۆت: حەفت کەمپە بۆ ڤەحەواندنا خەلکێ شنگار و زمار یێن د قوتابخانان دا نێشتەجێبووینە ھەتا نوکە یێ دھێنە درورستکرن و کارێ ل سەر دھێـتەکرن کو ل دەڤەرێن (شاریا، خانکێ، ٢ بێرسفێ ، داودیێ، قادیا، گەرماڤا) و کەمپێن خانکێ ٥٠%، شاریا٩٥%، بێرسفێ ئێک ٤٠%، یا دویێ ٧٠%، ب گشتی ھەتا ٧٥% کارێ ل سەر ھاتیەکرن و ھەر کەمپەکا بھێتە دروستکرن دێ بنگەھەکێ ساخلەمی و قوتابخانە و بنگەھەکێ پولیسان ھەبیت و دیسان مامۆستا ھەر دێ خەلکێ دەڤەرێ بن کو بھێنە قوتابخانێن خوە دەوامێ بکەن و دیسان دێ ھاریکاری بۆ ھێتەکرن و ھەر تشتەکێ پێدڤی چ وانەبێژ یان ھەر تشتەکێ پێدڤی پێ ھەبیت.
جمبد شوکری گۆتژی: خەلک د ناڤا (١٦٨)قوتابخانا دابوویە، زاخۆ (١٣٦) قوتابخانە، سێمێلێ (٩٧)، قوتابخانە و بەردەرەش (٢٩) قوتابخانابووینە….. ئانکو دەسپێکێ(٦٥٣) قوتابخانا ئاوارە تێدابوون ل سەرانسەری پارێزگەھا دھۆکێ ئانکو ھەتا نوکە (١٧٠) قوتابخانە ھاتینە ڤالاکرن.
جمبد شوکری ئاکرەیی ئاشکراکر کو پشتی ڤالابوونا قوتابخانان دێ پرۆسێسا پاقژکرنا قوتابخانا دەست پێ کەت، ھەر قوتابخانەکا بھێـتەڤالاکرن دھێتە نووژەنکرن و (تعقیمکرن) ئەڤە گەلەکا گرنگە و دەسپێکێ UNێ (١٠٣) قوتابخانە ب ستویێ خوەڤەگرتینە بۆ نوژەنکرن و پاقژکرنێ (تعقیم) کرنێ ئەڤە قوناغەکە، قوناعەکا دی، (نێچیرڤان بارزانی) سەرۆکێ حوکمەتا ھەرێما کوردستانێ ھاریکاریا رێڤەبەریا گشتی یا پەروەردا پارێزگەھا دھۆکێ کریە کو (٥) ملیۆن دۆلار بۆ پاقژکرن و نووژەنکرنا قوتابخانێن ئاوارە تێدا ل سەرانسەری ھەرێما کوردستانێ و (٤) ملیۆن دۆلارا بەھرا پارێزگەھا دھۆکێ نە ئانکۆ (٨٠%) ھەر قوتابخانەکێ بەھرا خوە دێ ھەبیت و لیژنەک دێ ھێتـە پێکئینان.
جمبد شوکری گۆت: ھەر قوتابخانەکێ (٤٠ھەتا٦٠ ) وەرەقا دێ بۆ ھێنە تەرخانکرن لێ ئەڤە نە یا فەرە، چونکە قوتابخانە ھەنە (٢) وەرقە ھەتا(١٠) وەرقا لێ بچن و ھەنە دبیت (١٠٠)وەرقە لێ بچن، سەردەری دگەل لیژنا قوتابخانێ دێ ھێتەکرن.
ئەنداما جڤاتا پارێزگەھا دھۆکێ ئاشکراکر ژی کو ھەکە چو قەیران و کاودان چێ نەبن و نورمال بیت قوتابی ١٨٠ رۆژان دەوامێ نەکەت باوەرنامەیا وی نە یا دانپێکریە، ئانکو ل سەر ئاستێ جیھانێ دانپیدان پێ ناھێـتەکرن، لێ کوردستانێ و ب تایبەت باژێرێ دھۆکێ ئەڤە نە مەرجە چونکە کاودان د تایبەتن و بارودوخ ھاتیە گوھۆرین و مەرج نینە دڤێت ١٨٠ رۆژان دەوامێ بکەن، یا گرنگ بابەتێ خوە بدووماھی بیت، ناڤبریێ گۆتژی: دەوام بھێتە درێژکرن مفا ژێ ناھێـتە وەرگرتن چونکە گەلەک قوتابخانا ھەتا (٣) دەوامان ھەنە، باشتر ئەوە گڤاشتن بھێنەکرن و لەز ل چێکرنا کەمپان بھێتەکرن و قوتابخانە ھەر زوو بھێنە ڤالاکرن، د ھەمان دەمدا گەلەک بھێنڤەدان ھەنە کو مفا ژێ بھێـتە وەرگرتن و رێڤەبەریا گشتی ئاشکراکریە کو ھەکە پێدڤی ب دەمی بوون دشێن رۆژا ئەینی ژی بکەنە دەوام، ب باوەرین کێمتر ژ (٤٥) رۆژا قوتابخانە دھێنە ڤالاکرن و بەردەوام چاڤدێریا ل سەر پرۆسێسێ دھێـتەکرن، خوشبەختانە ل (ئامێدیێ، ئاکرێ، شێخان) قوتابخانا ئاوارە تێدا نەماینە، بتنێ سەنگ ل سەر (دھۆک، زاخۆ، سێمێل)یە.
جمبد شوکری ئاکرەیی ئەوچەندەژی گۆت: پارێزگەھا دھۆکێ کێشا میلاکاتا ھەیە و خەلکێ دەڤەرێ ل جھێ خوە ناھێتە دامەزراندن بۆ نموونە خەلکێ زاخۆ ھاتیە دامەزراندن ل شێخان، ھەکە ھاتن وچوونێ بکەت، دێ مەترسیا رێکێ ھەبیت و دێ بگرانی ھاتن وچوونێ کەت، گەلەک نەخوش ھەنە و گەلەک ھەنە دوگیانن، رێژا دھۆکێ یا قانوونی یا دامەزراندنێ دڤێت(٢٣) پوینت (٤%) بیت، دڤێت وەزارەتا پەروەردێ میلاکاتا بۆ پارێزگەھا دھۆکێ دابین بکەت، ڤێ رێژا قانوونی نادەنە دھۆکێ(١٤،١٥)ددەن و سالا بوری ب پشتەڤانیا و بزاڤێن رژدێن د.عسمەت محەمەد خالد رێژا دھۆکێ بوو (١٧%)، لدۆر چارەکرنا بابەتی سەرۆکا لیژنا پەروەردێ گۆت: دێ سەرەدانا رێڤەبەریا گشتی یا پەروەردا پارێزگەھێ کەین، پەرلەمان، جڤاتا وەزیران، دیسان وەزارەتا پەروەردێ و دێ دەنگێ خوە یێ نەرازیبوونێ گەھینێ.
