رێڤه‌به‌رێ كۆمپانیان:قونته‌رچى و كۆمپانیێن دهۆكێ دشێن راسته‌وخوه پشكداریێ د ئاڤه‌دانكرنا مووسلێ دا بكه‌ن
ئەڤرۆ نیۆز، ئەمیر ئەترووشی
رێڤەبەرێ كۆمپانیان ل پارێزگەها دهۆكێ راگەهاند، قونته‌رچى و كۆمپانیێن دهۆكێ دشێن ب شێوەیەكێ راستەوخوه پشكداریێ د ئاڤەدانكرنا مووسلێ دا بكەن، بێی كو مۆلەتێ ژ بەغدا وەربگرن.
شێروان حیتۆ، رێڤەبەرێ كۆمپانیان ل پارێزگەها دهۆكێ بۆ ئەڤرۆ نیۆز دیار كر، هژمارەكا كۆمپانی و رێكخراوێن جیهانی بزاڤێ دكه‌ن دەست ب ئاڤەدانكرنا مووسلێ بكەن، ب تایبەت پشتی ڤەكرنا رێیا دهۆك بۆ مووسل، دبیت باژێرێ مووسل بكەڤیتە د قۆناغا ئاڤەدانكرنێ دا و قونته‌رچى و كۆمپانیێن دهۆكێ دشێن ب شێوەیەكێ راستەوخوه پشكداریێ د ئاڤەدانكرنا مووسلێ دا بكەن و دەلیڤێن كاری ل مووسل وەربگرن.
حیتۆ ئاماژە ب هندێ ژی دا، ئەڤە ژی لڤینەكا باشە بۆ كۆمپانی و قونته‌رچیێن دهۆكێ بەر ب مووسلێ بچن و كار د ئاڤەدانكرنا مووسلێ دا بكەن و ئەو دشێن پشت بەستنێ ل سەر مۆلەتێن خوە یێن كاری یێن هەرێما كوردستانێ بكەن، بێی كو مۆلەتێ ژ بەغدا وەربگرن.
رێڤەبەرێ كۆمپانیان ل پارێزگەها دهۆكێ ئاشكرا ژی كر كو لڤینا بازرگانی و كۆمپانیان ل پارێزگەها دهۆكێ بەر ب زێدەبوونێ یە و نها نێزیكی 3600 كۆمپانیان ل پارێزگەها دهۆكێ یێن هه‌ین.
