رێککەفتنا پارتی و ئێکەتیێ دێ پێگەھێ کوردان بھێز کەت
ئەڤرۆ نیۆز، قائید میرۆ:
دکتۆر مەحموود عوسمان، سیاسەتمەدارێ کورد بۆ ئەڤرۆ نیۆز دیار کر” رێککەفتنا پارتی و ئێکەتیێ بەرەف چارەسەرکرنا ئاریشەیان پێنگاڤەکا باشە، ژ بەر کو دێ کابینا نوو یا حوکمەتا ھەرێما کوردستانێ ھێتە پێک ئینان و دەستەیا سەرۆکایەتیا پەرلەمانی و سەرۆکێ ھەرێما کوردستانێ دێ ھێنە ھەلبژارتن، ھەتا ئاریشەیا کەرکووکێ ژی دێ چارەسەر بیت، بەلێ دڤێت رژد بن لسەر بزاڤێن خوە ئەز یێ گەشبینم گورەی ئەڤا ھاتیە بەلافکرن بگەھنە ئەنجامەکی دێ کاریگەریێن خوە لسەر رەوشا ھەرێما کوردستانێ ھەبیت.
ئەڤی سیاسەتمەدارێ کورد گۆتژی” ئەف لایەنێن ناخوازن بچنە حوکمەتێ و ببنە ئۆپۆزسیۆن بێگومان دژی پارتی و ئێکەتیێ نە، ھەرچەندە ئەز دگەل ھەبوونا ئۆپۆزسیۆنێ مە بۆ چاڤدێریکرنا کارێن حوکمەتێ، دگەل ڤێ ئێکێ ژی ناھێتە ڤەشارتن پارتی و ئێکەتی دو ھێزێن سەرەکی و سیاسینە دبیت ھەر ئەو دناڤبەرا خوە دا بگەھنە رێککەفتنێ نەک ھەموو لایەنێن سیاسی.
مەحموود عوسمان ئاشکراکر” ئەزموونا سالێن بۆری سەلماندیە ھەر دەمێ کورد ئێکگرتی بن، ئەڤە بەرامبەر دەرڤە ژی بھێزبووینە، ئاریشەیێن ناڤخوە بھێنە چارەکرن و حوکمەت و پەرلەمان دەست بکارێ خوە بکەن دێ کاریگەری لسەر بھێزبوونا پێگەھێ کوردان ھەمبەر بەغدا ژی ھەبیت.
