رێیا سەرەکیا ھەولێر – دھۆک دێ ھێتە تمامکرن
ئەڤرۆ نیوز:
بەرپرسەکێ حوکمەتا ھەرێما کوردستانێ ئاشکرا کر کو ژبەر قەیرانا دارایی بجە ئینانا پڕۆژێ رێیا سەرەکیا ھەولێر بۆ دھۆک ھاتیە راگرتن، بەلێ دەمێ پارە دھێتە مەزاختن دێ دەست ب تمامکرنا پرا گۆپالە ھێتەکرن و گۆت: “بڕیارە دۆبارە دەست ب تمامکرنا رێیا رۆڤیا – بەردەڕەش بھێتەکرن”.
سدقی ئیسماعیل ئامێدی، بریکارێ وەزارەتا ئاڤاکرنێ بۆ کاروبارێن رێک و پرا بۆ رۆژناما ئەڤرۆ دیار کر کو پڕۆژێ جووتسایدکرنا ھەولێر بۆ دھۆکێ کار ل سەر دھێتەکرن کو دبێژنێ رێیا بەدیل بۆ رۆڤیا کەلەک و گۆت: “قووناغا ئێکێ دەست پێ کر ب چێکرنا پرا گۆپالە، بەلێ مخابن ژبەر قەیرانا دارایی و نەبوونا پارەی کار ل سەر بجە ئینانا پڕۆژەی وەکو گەلەک پرۆژێن دی یێن حوکمەتێ ھاتیە راگرتن، ھەرچەندە ترۆمبێلێن بچووک ھاتن وچوونێ بڤێ پرێ دکەن و ھەتا رادەیەکی یا باشە”.
ناڤھاتی ئاماژە دا وێ چەندێ کو ھەر کۆژمەکێ پارەی ل ناڤخۆ یان دەرڤە بھێتە مەزاختن دێ دەست ب پڕۆژێ رێیا سەرەکی یا د ناڤبەرا ھەولێر بۆ دھۆکێ دا ھێتەکرن و گۆت: “مە پڕۆژەکێ دی ژی یێ ھەی دبێژنێ رێیا رۆڤیا بۆ بەردەڕەش، نوکە ئەوژی ھاتیە راگرتن، بەلێ بەلێندەری سۆزدایە دۆبارە دەست بکارێ خوە بکەت بۆ تمامکرنێ ڤی پرۆژەی، چونکی نوکە رێیا رۆڤیا بۆ بەردەڕەش ب نیڤی بوویە”.
