رەوشا مسرێ جارەکا دی ئالۆز بوو
ئەڤرۆ:
پشتی بریارا دادگەھا مسرێ کو تێدا حوسنی موبارەک سەرۆکێ وی وەلاتی ل گەل ھەر دو کورێن خوە بێ تاوان دەرچوون، ل پرانیا باژارێن مسرێ خوەنیشادانێن مەزن ل دژی بریارا دادگەھێ ھاتنە کرن و د ناڤبەرا خوەنیشادەران و ھێزێن ئێمناھیێ دا شەر دەرکەڤت و ھژمارەک خوەنیشادەر ھاتنە کوشتن و گەلەک کەس ژی بریندار بووینە و ب دەھان کەس ژی ژ ئالیێ ھێزێن دەولەتێ ڤە ھاتینە گرتن و رەوشەکا نەئاسایی ل قاھیرە و ھندەک باژارێن دی یێن مسرێ ھاتە راگەھاندن.
چاڤدێرێن سیاسی ژی دیار دکەن کو بریارا دادگەھێ بریارەکا سیاسی بوویە و ل سەر داخوازا عەبدولفەتاح سیسی سەرۆکێ مسرێ ھاتیە دان کو ئەوە ژی بوویە ئەگەر خەلکێ مسرێ گەلەک توورە بن، چونکو بریارا دادگەھێ سڤکاتیە کو ب خەلکێ مسرێ ھاتیە کرن و ھەموو کەس ژی دزانیت کو دەستێ موبارەکی د کوشتنا خەلکێ دا ھەیە و ب دەھان وەلاتیێن مسرێ ژ بەر خوەنیشادانێن ل دژی دەستھەلاتا موبارەکی ھاتبوونە کوشتن و ژ بەر ڤێ یەکێ ژی بریارا دادگەھێ ناھێتە قەبوول کرن.
ژ ئالیێ دی نەتەوێن ھەڤگرتی ژی د داخۆیانیەکێ دا راگەھاند کو دڤێت ھیزێن ئێمناھیێن مسرێ رێزێ ل داخوازیێن خەلکێ بگرن و نابیت وەک سالێن بۆری ھێز ل دژی خەلکێ مەدەنی بھێنە بکارئینان، نەتەوێن ھەڤگرتی داخواز ژ وەزارەتا داد یا مسرێ ژی دکەت نەھێلن سازیێن دادوەریێ بکەڤنە ژێر کاریگەریا سیاسەتێ و دڤێت دوور ژ سیاسەتێ کارێ خوە برێڤە ببەن.
