زاخۆ ب ژێدەرێن جۆراو جۆر یێن ئاڤێ یا زەنگینە
زاخۆ، دلۆڤان هالۆ:
ڕێڤەبەرێ سەرچاوێن ئاڤێ ل ئیدارەیا سەربخوە یا زاخۆ دیاركر، زاخۆ ب قەزا و ناحیە و گۆندێن خوەڤە ب ژێدەرێن جۆراو جۆر یێن ئاڤا سەر ئەرد و یا بن ئەرد یا زەنگینە.
محەمەد یاسین، ڕێڤەبەرێ سەرچاوێن ئاڤێ ل ئیدارەیا سەربخوە یا زاخۆ بۆ ڕۆژناما ئەڤرۆ دیاركر، گەلەك ژێدەرێن ئاڤێ یێن جۆراو جۆر ل زاخۆ هەنە وەكو ڕووبارێ خابیری و چەندین ڕوویێن بچووك یێن دهێنە سەر خابیری، هەر دیسان كانی و بیرێن سەر ئەرد و بیرێن كویر و بەنداڤ، و مفایەكێ باش ژ ڤان ژێدەرێن ئاڤێ دهێتە وەرگرتن.
ناڤهاتی ئاماژە ب وێ چەندێ ژی كر، ل زاخۆ 7 بەنداڤێن حكۆمی یێن قەبارە ناڤنجی هەنە كو یا ژ هەموویان مەزنتر بەنداڤا گۆندێ بۆسەلێ یە كو 350 هزار مەتر سێجایێن ئاڤێ د هەلگریت، و بەنداڤا دەركارێ ژی 250 هزار مەتر سێجایێن ئاڤێ د هەلگریت، و 10 بەنداڤێن بچووك یێن تایبەت هەنە یێن كو جۆتیاران بۆ خوە دروستكرین، ئەڤ بەنداڤە هەموو بۆ كەرتێ چاندن و ئاڤدان و ڤەخوارنا ئاژەلی دهێنە بكارئینان.
گۆت ژی:»ل زاخۆ 480 كانیێن ئاڤێ هەنە كو ل سالێن بووری بەهرا پتریا وان ژبەر هشكە سالیێ هشك ببوون، لێ ئەڤ سالە ژبەر هاتنا بەفر و بارانان دووبارە ئەو كانیە دەربووینەڤە».
