زیاد ئەحمەد: ئێکەم یاریزانێ دھۆکێ بووم بەرەڤ یانێن عیراقێ چوویم
ئەڤرۆ، محەمەد عەلی:
دیدارەکێ دا یاریزانێ کورێ باژێرێ سێمیلی و تیما تەپاپێ یا یانا نەفت ئەلوەسەت زیاد ئەحمەد بۆ رۆژناما ئەڤرۆ دیارکر کو ئەو شانازیێ پێ دبەت کو یاریزانێ ئێکێ بوو ژ پارێزگەھا دھۆکێ بەرەڤ یانێن عیراقێ چووی و شیایی ببیتە جھێ رازیبوونا تیمێن وان.
زێدەتر ناڤھاتی گۆت: دەستپێکا چوونا من بۆ دەرڤەیێ پارێزگەھێ د خولا عیراقێ دا دەمێ دگەل یانا دھۆکێ بووم و شیام ئاستەکێ مەزن نیشان بدەم بوویمە جھێ پووتەدانا یانێن مینا، شورتە، جەویە و نەفت ئەلوەسەت و نەجەف، لدووماھیێ ب کۆژمەیێ ١٧٠ ملیۆن دیناران من ھەڤبەست دگەل یانا مینا یا بەسرایی ئیمزاکر و شیام ببمە جھێ رازیبوونا وان، دویڤدا ل وەرزێ ئەڤ سالە ئەز ھاتمە دناڤ رێزێن یانا نەفت ئەلوەست و ھەتا نوکە بەردەوامم و سێ گۆل ژی من تۆمارکرینە و شازانیێ پێ دبەم کو دیاریا نەفت ئەلوەسەت و زاخۆ ئەز کاپتنێ تیمێ بووم.
ژلایەکێ دویڤە زیادی ئەوچەندە ژی دیارکر کو سەرەرایی چوونا وی بۆ مینا بەری دو وەرزان یا بزەحمەت بوو ژبەر گەلەک ھوکاران، بەلێ یاری بۆ یاریێ خوە گۆنجاند و نوکە کەلەک کەیفخووشە دگەل یانا خوە و گۆت ژی: بدیتنا من ئەگەر کاودانێن نەخووش یێن وەلاتێ عیراقێ نەبان د وێ باوەریێ دامە گەلەک یاریزان ژ پارێزگەھا دھۆکێ داخازکری بوون بۆ یانێن عیراقێ ب گشتی و تایبەتی یێن بەغدا.
ھەروەسا ناڤھاتی ئەوچەندە ژی نەڤەشارت کو ھەر دەمێ کاودانێن یانا دھۆک چێبنەڤە و بزڤریتە خولا عیراقێ ئەو دێ ب سەربلندی ڤە درێسێ یانێ کەتە بەرخوە، چنکو یانا دھۆکێ ب یانا مەزن و دایک دبین و بوویە ئەگەر ئەو لسەر ئاستێ عیراقێ بەرنیاسیت و بۆ ھەلبژارتیێ عیراقێ بھێتە داخوازکرن
