له‌هیان زیانه‌كا مه‌زن گه‌هانده پارێزگه‌ها دهۆكێ
ئه‌ڤرۆ نیوز، نه‌وزاد، عەلی، ره‌مه‌زان، مه‌حمود، بارزان:
سەر فەرمانا سەرۆکێ حکومەتا هەرێما کوردستانێ بڕی دو ملیار دینار بۆ زیان ڤێكه‌تیێن له‌هیا دهۆک و زاخۆ هاتنه ته‌رخانكرن ب راسپاردە و فەرمانا مەسرور بارزانی سەرۆکی حکومەتا هەرێما کوردستان.
بێوار عه‌بدولعه‌زیز، به‌رپرسێ راگه‌یاندنا به‌ره‌ڤانیا باژێری ل دهۆكێ بۆ ئه‌ڤرۆ نیوز گۆت: ژئه‌گه‌رێ له‌هیا شه‌ڤا بوری یا دهۆكێ زیانێن زۆر گه‌هشتنه وه‌لاتیان ژ وانان زیان گەهشتیە نێزیکێ 400 خانی و 100 دوکانان، دو کەسان گیانێ خوە 21 خێزان دناڤ خانیان و 11 وەڵاتی دناڤ ترومبێلا هاتینە رزگارکرن، ل تاخێ به‌رۆشكێ 48 ترۆمبێل پیچ بوینه.
زێده‌تر گۆت: ژبلی زیانێن سه‌نته‌رێ باژێری هه‌ڤده‌م زیانێن زۆر ل زاخۆ و ئامێدیێ و ده‌ڤه‌رێن دن ژی درۆست بوینه، لژنه ژلایێ به‌ره‌ڤانیا باژێری ل هه‌موو ده‌ڤه‌ران هاتینه پێكئینان بۆ خه‌ملاندن و دوڤچوون ل سه‌ر روودانان، چه‌ند رۆژێن بهێت دێ هێنه پێشكێشكرن بۆ جهێن شوله‌ژێ، روودان ژ ئه‌گه‌را دروستكرنا به‌نداڤه‌كا نه یاسایی لایێ كه‌سه‌كێ دروست بوویه، ئه‌و به‌نداڤ په‌قی یه و ب سه‌ر مالێن وه‌لاتیان دا هاتیه و هه‌موو ترۆمبێل ل جهه‌كێ كومكرینه‌و ئاڤ چویه مالێن هژماره‌كا زور یا خانیێن وه‌لاتیان، سوپاس بۆ خودێ چو زیانێن گیانی نه‌بوون، د نوكه دا تیمێن مه مژولێ پاقژكرنا تاخێن به‌رۆشكێ یه ئه‌ڤێن زیان پێكه‌فتی.
قایمقامێ زاخۆ د داخویانیەکێ دا بۆ ئەڤرۆ نیوز دیار کر لژنەیەک ژ بەرەڤانیا باژێری ل زاخۆ دێ سەرەدانان هەمی جهێن زیان ڤێ کەڤتی کەت بۆ زانینا زیانێن بەر وه‌لاتیان کەڤتین و دوهی رۆژا چار شەمبێ ژبەر دروست بوونا لەهیان زیان پێ گەهشتین دێ لژنەیەک ژ بەرەڤانیا باژێری ل زاخۆ سەرەدانا یان ڤێ کەڤتیێن زاخۆ کەت دا کو هەمی بهێنە تومار کرن و بۆ پارێزگەها دهوکێ بهێنە رەوانە کرن،هەر دوهی داخازا زیانان ژ مە هاتە کرن ژلایێ پارێزگەها دهۆکێ ڤە بەلێ ژبەر کو تیمێن مە مژوولی رزگار کرنا خەلکێ بوون و مە نەشیا وی کاری ئەنجام بدەن لەورا دێ ئەڤرۆ دەست ب تومار کرنێ هاتە کرن و دێ هەمی زیان ڤێکەڤتی هێنە تومار کرن و بۆ زیانان ژی پشکا شێری بەر ب زاخۆ کەڤتیە ژبەر کو خەلکەکێ زێدە توشی زیانێن ماددی بوینە و هەتا زیانێن گیانی ژی هەبوون.
موقه‌ده‌م فیراس یاسین ئاكره‌یی , به‌رپرسێ راگه‌هاندنا به‌ره‌ڤانیا باژێرێ ئاكرێ بۆ ئه‌ڤرۆ نیوزراگه‌هاند : ژبه‌ر وێ پێلا مه‌زنا بارانێ مه تیمێن خوه به‌ڵاڤركرینه بۆ پاراستنا سه‌رۆ مالێ وه‌لاتیان و چه‌ندین رێك مه ئاگه‌هداریا شوفێرا كریه كۆ هاتنووچۆنێ تێدا نه‌كه‌ن هه‌تا باران راوه‌ستیت ژبه‌ركۆ مه‌ترسیا هاتنه خوارا به‌ران هه‌یه ل گه‌ڵ كه‌فتنا ئاخێ زیان گه‌هشتیه چه‌ندین ماڵا ژبه‌ر بلند بۆنا ئاستێ ئاڤێ.
گۆتژی : ل سنوورێ ناحیا گرده‌سێن ژ ئه‌گه‌رێ هه‌رفینا خانیه‌كێ 30 سه‌رێن په‌زی ژناڤچوونه و بریسیێ ل ماڵه‌كێ دایه‌و ل سه‌نته‌رێ ئاكرێ ژی كه‌سه‌كێ خوه سوتیه‌و گیانێ خوه ژ ده‌ستدایه‌و بارانێ زیان گه‌هاندیه چه‌ندین مولده‌یان و گه‌ره‌كێن دی .
ئیسماعیل موسته‌فا قایمقامێ قه‌زا ئامێدیێ بۆ ئه‌ڤرۆ نیوز دیاكر، زۆرترین باران ل سه‌رانسه‌رێ كوردستانێ ل ده‌ڤه‌را ئامێدیێ باریه ژ به‌ر وێ یه‌كێ زیانێن زۆر گه‌هاندینه وه‌لاتیان و پرۆژێن خزمه‌تگوزاری ل ده‌ڤه‌رێ و گۆت: ل تاژیكا تا دێره‌لۆك زیانێن زۆر گه‌هشتینه جاده‌یا سه‌ره‌كی ل ده‌ڤه‌رێ و چه‌ندین جهان ره‌خێن جادێ خراب بووینه و مه‌ترسی ل سه‌ر جادێ و هاتن و چونێ ژی دروست كریه.
ناڤبری دیاركر، ل كومه‌لگه‌ها قه‌دشێ و ئینشكی دورێن 10 مالان ئاڤ چووبویێ و زیانێن مالی گه‌هشتنه خودانێن وانان و هه‌روه‌سا ڤان باران و له‌هیان زیان گه‌هاندینه چاندنا ده‌رامه‌تێ جوتیاران و هه‌ژماره‌كا زه‌ڤیێن چاندنێ و گۆت: تشتێ ژ هه‌موویان نه‌خوه‌شتر خراب بوون و ژناڤ چوونا دوو پرێن ده‌رباز بوونێَ بوویه و هاتن و چون ل ناڤبه‌را چه‌ندین گۆندێن ده‌ڤه‌رێ بۆ سه‌نته‌رێ قه‌زایێ و سه‌نته‌رێن ناحیا هاتیه برین وه‌ك پرا دێره‌شێ و پرا سپنه ژناڤچوینه و پرا دێره‌ش و پرا گه‌له‌كا و مه‌هیدێ زیان گه‌هشتیێ و هاتن و چون ل سه‌ر هاتیه برین و كو ڤان بارانان مه‌ترسی ل سه‌ر چه‌ندین سكرێ ئاڤێ دروست كربوون و ئه‌ڤ یه‌كی ژی ببوو جهێ ترسێ ل ده‌ڤ مه و خه‌لكی ب گشتی ژ به‌ر وێ یه‌كێ ژی تیمێن مه و یێن به‌نداڤا و هه‌روه‌سا یێن باژێرڤانیا مژیلی هندێ بووینه كو مه‌ترسیێ ل سه‌ر ڤان پران كێم بكه‌ن ونه‌هێلن.
ناڤهاتی دیار ژی كر، رێژا باران بارین ژ هزارێ ده‌رباز بوویه و دڤان 48 ده‌مژمێران دا نێزیكی 200 ملیمێن بارانێ ل ده‌ڤه‌رێ باری نه.
ژلایێ خوه ڤه سامی ئوشانه رێڤه‌به‌رێ ناحیا دێره‌لۆك دیار كر، كو ژئه‌نجامێ بارانێن زۆر ل سنورێ ناحیا دێره‌لۆك پرا سپنه‌ی یا پیاده هه‌رفتیه كو هێلا ئاڤا ڤه‌خوارنێ ژ كانیێن گیرا بۆ كومه‌لگه‌ها دیره‌لۆك ڤه‌دگوهێزیت ل سه‌رڤێ پرێ ده‌رباز دبوون مه‌ترسی ل سه‌ر دروستكریه و گۆت: پرا گوندێ گه‌له‌كا و مه‌هیدێ بو دیره‌لوك زیانێن زۆر گه‌هشتینێ وهاتن چون ل سه‌ر هاتیه برین و تیمێن باژێرڤانیا مه مژیلی چێكرنه‌ڤه‌یا وێ نه و ل نێزك گوندێ سه‌رگه‌لێ ره‌خه‌كی جادێ ئاخ ل بن چوویه و دبیته مه‌ترسی ل سه‌ر جادێ كو رێك بهێته برین و جادا سه‌ره‌كی یا دێره‌لۆك شێلادزێ به‌رامبه‌ری گوندێ هاریكا ئاخ ژ بن جادێ چوویه مه‌ترسی ل سه‌ر جادێ دروست كریه.
سەردار یەحیا عبدالعزیز،قائیمقامێ قەزا شێخان بۆ ئەڤرۆ نیوز گۆت ل سنورێ قەزا شێخان زیانێن بارینێ دروست کریە و زەر گەهاندیە 25 مالان ل گوندێ دوشیفانێ ئاڤ چو بو دناڤ مالێن وان دا.
