زیندانی دشێت ب رێیا سکالایەکێ داخوازا لێبۆرینی بکەت
ئەڤرۆ نیوز:
لیژنا مافێ مرۆڤی و لێژنا تایبەت ب ئازادکرنا زیندانیان ل سەرۆکاتیا ھەرێما کوردستانێ کۆمبوون و تێدا دانوستاندن ل دۆر ئازادکرنا زیندانیان ھاتەکرن بۆ حالەتێن تایبەت و گشتی راگەھاند کو ھندەک خال بۆ لێبۆرینا تایبەت ھاتینە دیارکرن، ھەر زیندانیەکێ ئەڤ خالە لنک ھەبن دێ شێت سکالایەکێ بۆ سەرۆکاتیا ھەرێمێ بلندکەت و داخوازا لێبۆرینێ کەت، دیارکر ژی سالێن بۆری 15 کەس ل چاکسازیێن ھەرێما کوردستانێ بەر لێبۆرینا تایبەت کەفتینە و چو واستە تێدا نەبوویە.
سەعید مەسیفی، ئەندامێ لیژنا مافێ مرۆڤی ل پەرلەمانێ کوردستانێ بۆ ئەڤرۆ گۆت” لیژنا مافێ مرۆڤی و لێژنا دەرکرنا لێبۆرینا گشتی ل سەرۆکاتیا ھەرێما کوردستانێ کۆمبوونەک گرێدایە و تێدا ب ھویری بەحسێ دەرکرنا لێبۆرینێ بۆ زیندانیان ھاتیەکرن، ل سەروکاتیا ھەرێمێ ئەنجوومەنەک بۆ دەرکرنا لێبۆرینێ بۆ زیندانیان ھەیە و د کۆمبوونێ دا تەکەزی ل سەر ڤێ چەندێ ھاتەکرن، کو ئەڤ خەلکێ بەری نوکە ل چاکسازیێن ھەرێما کوردستانێ ھاتینە ئازادکرن و بەر لێبۆرینێ کەفتین ھەموو ب شێوەیەکێ قانوونی بوویە و چو واستە تێدا نەھاتیەکرن، ژبەرکو ھندەک پیڤەر ھەنە و تنێ سەرۆکێ ھەرێمێ بڕیار نەدایە خەلک بھێتە ئازادکرن، بەلکۆ 10 خال ھەنە و ھەموو زیندانیان ڤەدگریت، گۆتژی ژوان خالێن ھاتینە دیارکرن، دڤێت کەسێ ھاتیە حوکمکرن دو ل سەر سێ دەمێ خوە دەربازکربیت و خودان خێزان بیت، ھەروەسا نەخۆشیا دومدرێژ ھەبیت و ددەمێ زیندانیکرن گۆھۆڕین ب سەردا ھاتبن مافێ خەلکی ل سەر نەما بیت و تنێ مافێ گشتی مابیت، زۆر خالێن دیژی ھەنە، ئەنجوومەنی ئەم پشتڕاستکرین چو زیندانیەک نەبوویە ب بڕیارا تایبەت ژلایێ سەرۆکێ ھەرێمێ ھاتبیتە ئازادکرن ھەتا ئەگەر ھات بیت ژی ژلایێ ئەنجوومەنی پێداچوون بۆ ھاتیەکرن و پشتی ڤەگرتا قانوونێ ھاتیە ئازادکرن.
مەسیفی گۆتژی” پشتی سەرھەلدانێ ھەتا نوکە تنێ دو جارا لێبۆرینا گشتی ھاتیە دەرکرن و پتریا وان کەسێن بەر لێبۆرینا گشتی کەفتین دۆبارە ھاتینە دەستەسەرکرن، بەلێ سالێن بۆری تنێ 15 کەس بەر لێبۆرینا تایبەت کەفتینە، ھەموو ژی گورەی خالێن دیاریکری بوویە و ھەموو ژی باشتربووینە و نەھاتینەڤە گرتن، نوکە پێڤە ھەموو زیندانیەکی ماف ھەیە داخوازا ئازادکرنێ بکەت و دشێت سکالایەکێ بۆ لێژنا تایبەتمەند بلند بکەت و تێدا داخوازا لێخۆشبوونێ بکەت، گۆتژی لێژنە دێ پێداچوونێ کەت ئەگەر گورەی خالێن ھاتینە دیارکرن تێدا ھەبن ئەڤە دێ پێداچوون بۆ سکالایێ ھێتەکرن و گورەی دەستھەلاتا لیژنێ دی بڕیار ل سەر ھێتەدان، بەرۆڤاژی ئەگەر خالێن ھاتینە دیارکرن ڤەنەگریت ئەڤە دێ سکالا ھێتە رەتکرن و چو پێداچوون بۆناھێنەکرن.
زێدەتر گۆت: بلا وەلاتی ئاگەھدار بن ھەموو زیندانیەکی مافێ ڤێ چەندێ ھەیە داخوازا لێخۆشبوونێ بکەت و لێژنە دێ پێشوازیێ ل داخوازا وی کەت.
