زێرەڤانی ب گوھورینا یاریگەھێ یا مفاداربوو زاخۆ ژی توشی خوسارەتیا دوێ بوو
ئەڤرۆ،ھەژار مەعروف:
پشتی بورینا سێ یاریان تیما تەپا پێ یا زێرەڤانی شیا سەرکەفتنا خوە یا ئێکێ ل وەرزێ ئەڤ سالە دخولا پلا نایاب یا کوردستانێ دا توماربکەت پشتی ئەڤرۆ شیای سەرکەفتنەکا گرنگ ل سەر یانا نەوروز توماربکەت ب دو گولان بەرامبەر گولەکێ دوێ یاریێ دا ئەوا ل یاریگەھا یانا دھۆک یا سیێ ھاتیەکرن ژ چارچوڤێ یاریێن گەرا سێ ژ قوناغا ئێکێ کو بریار بوو ئەڤ یاری یە ل یاریگەھا یانا زێرەڤانی ھاتبا ئەنجامدان لێ ژبەر ئەو باران بارینا زێدە ئەوا ل باژێرێ دھۆکێ ل ماوێ دو رۆژێن بوری و ئەردێ یاریگەھا یانا زێرەڤانی نەیاھاریکاربوو .
د کەشوھەوایەکێ بارانیی دا یاریا ھەردو تیمان دەستپێکر کو ل دەستپێکا یاریێ ھەردو تیمان چو مەترسی ل سەر گولێن ئێک پەیدانەکرن پرانیا یاریێ ل نیڤا یاریگەھێ ھاتنەکرن و ل جارێکا دووماھیێ ژ یاریێ ھەردو تیمان گڤاشتن ل سەر گولێن ئێک کرن تایبەت یانا زێرەڤانی چەند دەلیڤە ژ دەستدان ئەو بوو ل خولەکا ٤٤ پیشەکارێ بەرازیلی یێ یانا زێرەڤانی تیاگو ئیدواردو ب لێدانا پەنەلتی گولا ئێکێ بوو تیما خوە زێرەڤانی تومارکر و نیڤا ئێکێ ب ڤی ئەنجامی ب دووماھیی ھات.
ل نیڤا دوێ ھەردو تیم ب ھێزتر ھاتنە دناڤ یاریێ دا ئاستێ ھونەری یێ ھەردو تیمان د ڤێ نیڤێ دا باشتر بوو ژ نیڤا ئێکێ تایبەت پشتی راھێنەرێن ھەردو تیمان چەند گوھورین ل پێکھاتیێ تیمێن خوە کرین یانا نەوروز دڤێ نیڤێ دا چەندین مەترسی ئێخستنە سەر گولا تیما زێرەڤانی لێ گولچیی و بەرەڤانێن یانا زێرەڤانی بەرامبەر ھەمی ھێرشێن ئەوان راوستا لێ بەرەڤانیا زێرەڤانی نەشیا ھێرشێن نەوروز راوستینت ئەو بوو ل خولەکا ٨٠ کابتنێ تیما نەوروز کامیران عەلی شیا گولا وەکھەڤیێ بوو تیما خوە توماربکەت و پشتی ڤێ گولی ل دەە خولەکێن دووماھیێ راھێنەرێ یانا زێرەڤانی یاریا خوە ب تمامی کرە ھێرشبەری تایبەت پشتی ھاتنا ئەحمەد مەئیمون بوو ناڤ یاریێ ئەو بوو ئەڤی یاریزانی شیا گولا دوێ بوو ھەڤالێ خوە یێ بەرازیلی تیاگو بەرھەڤبکەت و پیشەکارێ بەرازیلی تیاگو ئیدواردو ب سەری گولا دوێ ل خولەکا ٨٦ توماربکەت و تیما زێرەڤانی بەر ب سەرکەفتنا ئێکێ ل وەرزێ ئەڤ سالە ببەت .
ژلایەکێ دویڤە نوونەرا دوێ یا پارێزگەھا دھۆکێ تیما زاخۆ توشی خوسارەتیا دوێ ل دویڤ ئێک بوو ل وەرزێ ئەڤ سالە پشتی ئەڤ جارە ل ناڤ ئەرد و جەماوەرێ خوە توشی خوسارەتیێ بوو ل گەل یانا ھندرین کو ڤێ تیمێ د گەشتا خوە یا دوێ دا کێمتر ژ دو حەفتیان بوو پارێزگەھا دھۆکێ یا سەرکەفتی بی پشتی ل حەفتیا ئێکێ ژی خولێ شیای سەرکەفتنێ ل سەر یانا زێرەڤانی توماربکەت ب گولەکێ بێ بەرامبەر و د گوپیتکا یاریێن ڤێ حەفتیێ دا تیما ھەولێر شیا سەرکەفتنێ ل سەر ھەلگرا ناسناڤێ خولێ یانا پێشمەرگا ھەولێرێ توماربکەت ب گولەکێ بێ بەرامبەر و یاریا دناڤبەرا ھەردو یانێن برایەتی و ئارارات ھاتە پاشئێخستن ژبەر ئەو باران بارینی کو یاریگەھا یانا ئارارات نە یا ھاریکاربوو .
