زێرەڤانی د گوپیتکا یاریێن ڤێ حەفتیێ دا و زاخۆ ژی دێ بێ پشکداریا پێنج یاریزانان ھەمبەری ھەلگرا ناسناڤی بیت
ئەڤرۆ، قەیس وەیس:
بریارە ئەڤرۆ گەرا دوێ ژ قوناغا ئێکێ یا خولا پلا نایاب یا ھەرێما کوردستانێ ب ئەنجامدانا چار یاریان بھێتەکرن کو ھەردو نوونەرێن پارێزگەھا دھۆکێ دێ ژ دەرڤەی یاریگەھێن خوە یاریێن خوە یێن ڤێ حەفتیێ ئەنجام دەن کو ئەرکێ ھەردو یانە دڤێ حەفتیێ دا یێ ب سانەھی نابیت ژبەرکو ھەردو نوونەرێن پارێزگەھێ دێ ھەمبەری دو تیمێن بەربژار بوو برنا ناسناڤێ وەرزێ ئەڤ سالە یێ خولێ کەن.
تیما تەپا پێ یا زاخۆ ئەوا ل حەفتا بوری شیای سەرکەفتنەکا گرنگ ل سەر یانا ھەولێر توماربکەت دێ ئەڤرۆ یاریا خوە ل پیرمام ھەمبەری ھەلگرا ناسناڤێ وەرزێ بوری تیما پێشمەرگا ھەولێر کەت ل دویڤ گوتنا راھێنەرێ یانا زاخۆ وەسا دبینت کو بوو ڤێ یاریێ ئەوان ئاریشەیێن مەزن ھەیە ژبەرکو پێنج یاریزانێن ئەوی نەشێن پشکداری ل گەل تیمێ بکەن کو چار ژ ئەوانان ل ھێلا بەرەڤانیێ دکەن ژبەر پشکداریا ئەوان دخولا عیراقێ دا .
زێدەتر ئەمین یونس بوو رۆژناما ئەڤرۆ دیارکر نە پشکداریا چار یاریزانێن سەرەکی ل ھێلا بەرەڤانیێ بێ گومان دێ کارتێکرنا خوە ل سەر ئاستێ تیمێ ھەبیت لێ ئەوان بوو ڤێ یاریێ چەند پێگھورێن باش بەرھەڤکرینە و ئەوی باوەریەکا مەزن ب شیانێن ئەوان گەنجان ھەیە دێ شێن ئاستەکێ بلند پێشکێشکەن و ھەمی شیانێن خوە تەرخان کەین بێ خال ژ یاریگەھا پێشمەرگە نە ڤەگەرین.
ژلایەکێ دویڤە د گوپیتکا یاریێن ڤێ حەفتیێ دا ھەردو یانێن برایەتی و زێرەڤانی دێ ھەمبەری ئێک بەن ل یاریگەھا برایەتی ل باژێرێ ھەولێر کو زوربەیا پێشبینیا بەری دەستپێکرنا خولێ بوو ئەڤان ھەردو تیمان چوویە بوو ھەڤرکیا ناسناڤێ خولێ ژبەرکو ھەردو تیمان بوو وەرزێ ئەڤ سالە بەرھەڤیێن باش کرینە تیما زێرەڤانی ئەوا د یاریا بوری دا خوسارەت بووی ل ناڤ ئەرد و جەماوەرێ خوە دا دێ ھەمی بزاڤا کەت ب ئەنجامەکێ سەرکەفتی د ڤێ یاریێ دا ڤەگەریت و شیانێن خوە بوو ھەمی تیمان د یاربکەت دڤێ یاریێ دا بەرامبەر تیما برایەتی ئەوا ل وەرزێ ئەڤ سالە بەرھەڤیێن باش کرین کو چەندین یاریزانێن بەرنیاس ل سەر ئاستێ ھەرێمێ ل خوە کومکرین ئەوان ژی دڤێت بەردەوامی ب دەنە سەرکەفتنێن خوە پشتی ل یاریا بوری شیاین ب سێ خالێن گرنگ ژ کەلار ڤەگەرن بوو ڤێ یاریێ راھێنەرێ یانا زێرەڤانی سلێمان رەمەزان بۆ رۆژناما ئەڤرۆ گوت: یاریا ئێکێ بوویە گرێیەک بوو یانا مە کو چەندین سالە ئەم نەشیاینە سەرکەفتنێ توماربکەین ھەر چەندە یاریزانێن مە گەلەک بزاڤکرن د یاریا ئێکێ لێ نەشیان وێ گرێیێ ڤەکەین و دڤێ یاریێ دا دێ ھەمی شیانێن خوە تەرخان کەین بوو سەرکەفتنا ئێکێ ل ڤی وەرزی و ژ دەستدانا خالان ژ دەستپێکێ دێ مە ھەر زیکا ژ ھەڤرکیا برنا خولێ بێ بارکەت لەورا بوو ڤێ یاریێ مە بەرھەڤیێن باش کرینە ھەر چەندە دو یاریزانێن سەرەکی ل ھێلا بەرەڤانیێ نەشێن پشکداریێ بکەن ژبەر ھنگافتنا ئەوان لێ ئەوان پێگوھورەکێ باش ھەیە و باوەریەکا مەزن ب پێگھورێ خوە ھەیە.
ژلایەکێ دویڤە ھەر ژ یاریێن ڤێ حەفتیێ بریارە تیما ھندرین ل یاریگەھا خوە بەرامبەر یانا ئارارات بکەت و تیما تەپا پێ یا نەوروز دێ یاریا خوە یا ئێکێ ل وەرزێ ئەڤ سالە ئەنجامدات پشتی ل حەفتیا بوری یا چاڤەرێکری بوو کو بریارە ڤێ گەرێ ل یاریگەھا خوە مێڤانداریا یانا شێروانە بکەت و تیما ھەولێر د ڤێ حەفتیێ دا دێ یا چاڤەرێکری بیت.
