ساخلەمی: ھێشتا کۆرۆنا یا دناڤ خەلکی دا
ئەڤرۆ نیۆز، قائید میرۆ:
ئەڤرۆ حەفت حالەتێن دی یێن ڤایرۆسێ کۆرۆنایێ ل ھەولێرێ ھاتنە تۆمارکرن و پەیڤدارێ وەزارەتا ساخلەمیێ ژی دبێژیت، پێدڤیە وەک بەرێ رێنمایێن خۆپارێزیێ بھێنە بجهئینان.
دکتۆر محەمەد قادر، پەیڤدارێ وەزارەتا ساخلەمیێ بۆ ئەڤرۆ نیۆز گۆت: (ئەم ھۆشداریێ ددەین ل دۆر پێگیرنەبوونا وەلاتیان ب رێنمایێن خۆپارێزیێ و ھێشتا ڤایرۆسێ کۆرۆنا مایە ل ھەرێما کوردستانێ و مەترسی ل سەر ژیانا وەلاتیان ھەیە، لەوڕا نابیت وەلاتی بجهئینانا رێنمایان خەمساریێ بکەن، بەرۆڤاژی پێدڤیە بەردەوام رێنمایان بجە بینن).
دکتۆر محەمەد قادر گۆتژی” رۆژێن بۆری چەندین حالەتێن ڤایرۆسێ کۆرۆنا ھاتینە تۆمارکرن، ئەڤە ژی نیشانا ڤێ چەندێ یە ھێشتا کۆرۆنا یا دناڤا خەلکێ مەدا ھەی، بەلێ دشێم بێژم ئەم ھەتا رادەیەکێ زۆر سەرکەفتینە ب سەر کۆنتڕۆلکرنێ و رێژا مرنێ کێمترە بەراورد ب ولاتێن دی.
