قەیس وەیس:
بڕیار ئەڤرۆ ژی سێ یاریێن دی ژ هەڤڕكیێن گەڕا شەشێ یا خولا ستێرێن ئیراقێ یا فوتبۆلێ بهێنە ئەنجامدان، یانەیا دهۆك و هەولێر د ناڤ ئەرد و جەماوەرێ خوە دا یانەیێن غاز ئەلشیمال یا كەركووكی و دیالا مێڤان بكەن، یارییا سێیێ یا ئەڤرۆ یانەیا شورتە دێ بیتە مێڤانا یانەیا ئەلغراف.
پشتەڤان ب ژڤانێن سەركەڤتنێ نە
بڕیارە ئەڤرۆ ل دەمژمێر 6:45 بەری مەغرەب پشتەڤانێن یانەیا دهۆك چاڤەڕێ یارییەكا دینە یا تیما خوە د خولێ دا دەمێ مێڤاندارییا یانەیا غاز ئەلشیمال كو دهێتە هژمارتن نوونەرا پێنجێ یا كوردستانی د ڤێ چالاكیێ دا، ئەلهۆیێن چیا ڤەگەڕیاینە ڕێیا سەركەڤتنان پشتی د یارییا بۆری دا سەركەڤتنەكا گرنگ ل سەر جەوییە ئینایی ب 2-1 گۆلان، ڕێزبەندیا دهۆكییان وەكو دەستپێك یا خراب نینە ئەوا ب حەفت خالان ل ڕێزا هەشتێ دهێت، ئێك سەركەڤتن و چار وەكهەڤی هەنە، یارییا ئەڤرۆ ب سانەهی نابیت بۆ خودانێن بەرانبەر تیمەكا نوو یا خولێ ئەوا پێنج خال كۆمكرین ل ڕێزا 12 دهێت ژ سەركەڤتنەك، دو وەكهەڤی و دو خوسارەتیان.
گۆلپارێزێ دهۆكێ یاریێ ناكەت
كومەیل سەعەد گۆلپارێزێ یانەیا دهۆكێ ئەوێ د یارییا بۆری دا بەرانبەر جەوییە تووشی دو هنگاڤتنان بوو، یا ئێكێ داعویرانا ئەزامی سۆپاس بۆ خودێ هاتە قورتالكرن، یا دویێ هنگاڤتنا مللیێ ڕاستی، ل دووڤ ڕاپۆرتا نۆژداری دبیت بۆ ماوەیێ ئێك مەهــ دووركەڤیت ژ یاریگەهان، لێ گۆلپارێز ئەحمەد بەشار ب باوەریەكا مەزن و پشتگەرمی ب شیانێن خوە بەرهەڤە بۆ جهگرییا وی .
كاپتنێ تیمێ ب هیڤییە بۆ سێ خالان
د دیدارەكا تایبەت دا بەیار ئەبۆبەكر كاپتنێ تیما یانەیا دهۆكێ ب هیڤییە د یارییا ئەڤرۆ دا تیما وان ب شێن باشترین ئاست و سەركەڤتنێ بینیت و گۆت: د نوكە دا ئەم یێ ڕەوشەكا باش یا دەرۆنی و ئاستی دا ینە، یارییا ئەڤرۆ ب هیڤیینە سێ خالان دەستڤە بینن و بەردەوام دلێ جەماوەرێ خوە خۆشبكەین، پێنەڤێت هەر یارییەكا دكەین ب سانەهی نابیت لێ دڤێت بۆ سەركەڤتنێ یاریێ بكەین.
هەولێر دێ بزاڤێن پاراستنا سەرێ لیستێ كەت
ژلایێ خوەڤە ئەڤرۆ تیما یانەیا هەولێر ژی دێ ل یاریگەها خوە شەهید فرانسۆ حەریری مێڤاندارییا یانەیا دیالا كەت و چاڤێ وێ ل سێ خالانە ژبۆ پاراستنا سەرێ لیستا خولێ، ئەوا نوكە ب كۆمكرنا 11 خالان ل رێزا ئێكێ دهێت ژ سێ سەركەفتن، دو وەكهەڤیان، ژلایێ خوەڤە یانەیا دیالا بتنێ پێنج خال كۆمكرینە ل ڕێزا 11ێ دهێت ئێك سەركەفتن، دو وەكهەڤی و دو خوسارەتییان.
