سالانە نێزیكی 800 تەنێن زەیتا زەیتوونان دهێنە بەرهەمئینان
رەمەزان زەكەریا:
ب ڕێكا پڕۆژەیەكێ وەزارەتا چاندنێ و ژێدەرێن ئاڤێ ل هەرێما كوردستانێ، ل سەر ئاستێ ناڤخۆ و نێڤدەولەتی كار دكەت، بۆ وێ چەندێ زەیتا زەیتوونان یا هەرێما كوردستانێ ببیتە بڕاندەكێ نێڤدەولەتی.
قارەمان سیان، پەیڤدارێ وەزارەتا چاندنێ و ژێدەرێن ئاڤێ بۆ ئەڤرۆ گۆت: «پڕۆژەیێ كۆرێس ژ لایێ پەیمانگەها سیهام باری یا ئیتالی ڤە ب هەماهەنگی ل گەل وەزارەتا چاندنێ دهێتە بجهئینان، ژ لایێ شارەزایێن بیانی و ناڤخۆیی ڤە هەلسەنگاندن بۆ سالەكا كاركرنا پڕۆژەی هاتیە كرن، ل سەر پێكهاتە و جۆرێن زەیتوونان و كارگەهان ڤەكۆلین هاتیە كرن».
ناڤبری گۆت ژی: «ئارمانجا پڕۆژەیێ كۆرێس بهێزكرن و پشتەڤانیكرنا گوندنشینێن هەرێما كوردستانێ یە د زنجیرا بهایێ زەیتا زەیتوونان دا و دروستكرنا بڕاندێ كوردستانی، كو پشكەك ژ دیتنا سەرۆكوەزیران مەسرور بارزانی د كابینەیا نەهێ دا بریتی بوو ژ گەشەپێدانا بەرهەمێ ناڤخۆیی یێ جوتیاران و هنارتنا وان بۆ وەلاتێن دەرڤە».
قارەمان زێدەتر گۆت: «بەرهەمئینانا زەیتوونان ل هەرێما كوردستانێ، ژ وان بەرهەمانە ب پشتەڤانیكرنا حكومەتا هەرێما كوردستانێ چوویە د قووناغەكا نوو دا، ب ڕێكا چەندین كارگەهانن سالانە نێزیكی 800 تەنێن زەیتا زەیتوونان، ب كوالێتیەكا زۆر باش دهێنە بەرهەمئینان و ژ بەر هەبوونا خواستەكا زۆر هەر ل ناڤخۆ دهێتە ساخكرن و كێم بۆ دەرڤە دهێتە هنارتن».
